قاسىم-جومارت توقايەۆ پرەزيدەنتتىگىنىڭ ءبىر جىلى: قازاقستان ۇدەمەلى رەفورمالار جولىندا

اممان. قازاقپارات - يوردانيانىڭ «پەترا» مەملەكەتتىك اقپارات اگەنتتىگىنىڭ ساياسي شولۋشىسى، يوردانيا ەنەرگەتيكا جانە مينەرالدى رەسۋرستار مينيسترلىگىنىڭ سپيكەرى ماشحۋر ءابۋ ەيد قازاقستان پرەزيدەنتى قاسىم-جومارت توقايەۆ باسشىلىعىنىڭ ءبىر جىلدىق قورىتىندىسى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

ماشحۋر ءابۋ ەيد قازاقستانعا بىرنەشە رەت ساپارلاعان، 2015 -جىلى كەزەكتەن تىس پرەزيدەنت سايلاۋىن جازۋعا جانە ەكسپو-2017 حالىقارالىق كورمەسىنە بارعان.

ونىڭ باعالاۋىنشا، قازاقستان پرەزيدەنتى قازاقستاندى العا دامىتۋ ءۇشىن نە ىستەۋ قاجەتتىگىن بىلەدى. اسىرەسە، پرەزيدەنت ق. توقايەۆ قۇرعان ۇلتتىق قوعامدىق سەنىم كەڭەسى از ۋاقىتتا ۇكىمەت پەن حالىق اراسىنداعى ديالوگتى جاقسارتا الدى.

«ۇلتتىق قوعامدىق سەنىم كەڭەسى پلاتفورماسىندا ۇزدىك يدەيالار گەنەراتسياسى ىسكە قوسىلدى. ونىڭ ىشىندەگى ەڭ قاجەتتىلەرى جۇزەگە اسىرىلىپ جاتىر. تانىمال ساياساتكەرلەر، شىعارماشىلىق زياتكەرلەرى، قوعام قايراتكەرلەرى جانە ەكونوميستەر ەلدىڭ قوعامدىق- ساياسي ومىرىنە بەلسەندى تارتىلعان»، - دەپ پىكىر ءبىلدىردى م. ءابۋ ەيد.

ۇلتتىق كەڭەس ۇسىنىستارىن ەسكەرە وتىرىپ، پرەزيدەنت ق. توقايەۆ ساياسي رەفورمالار كەشەنى اياسىندا ءبىرقاتار زاڭنامالىق اكتىلەرگە قول قويدى.

بۇل اكتىلەر «حالىق ۇنىنە قۇلاق اساتىن مەملەكەت» تۇجىرىمداماسى مەن ازاماتتىق قوعامنىڭ ءرولىن ارتتىرۋداعى ماڭىزدى قادام سانالادى. سپيكەردىڭ ايتۋىنشا، قازاقستانداعى جاڭا قۇقىقتىق نورمالار پىكىرلەر پليۋراليزمى، بالاما كوزقاراستار، سىندارلى ۇستانىم جانە سايلاۋشى الدىنداعى جاۋاپكەرشىلىك سىندى قۇندىلىقتاردى نىعايتا تۇسەدى.

سونىمەن بىرگە، زاڭناماعا ەنگىزىلگەن تۇزەتۋلەر پارتيالاردىڭ ەلدەگى ساياسي پروتسەستەرگە ىقپالىن ارتتىرۋعا ىقپال ەتەدى. ولار جاڭا پارتيا قۇرۋعا جانە ەلدەگى ساياسي پارتيالار ءومىرىن جانداندىرۋعا سەپتىگىن تيگىزەدى. ءتۇرلى پىكىرلەر مەن ۇسىنىستاردى ەركىن تالقىلاۋ ۇكىمەت شەشىمدەرىن ازىرلەۋگە جانە قابىلداۋعا وڭ اسەر ەتەدى.

اۆتور: ايجان سەرىكجان قىزى