بالاسىنا ۆاكسينا جاساۋدان باس تارتقان اتا-انا ونىڭ دەنساۋلىق قۇقىقتارىن شەكتەيدى - ەلجان ءبىرتانوۆ
بۇل تۋرالى ق ر پارلامەنتى سەناتىنىڭ جالپى وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«اتا- انالار بالاسىن ۆاكسيناتسيالاۋدان باس تارتا وتىرىپ، بالانىڭ دەنساۋلىق قۇقىقتارىن شەكتەيتىندىگىن اتاپ وتكەن ءجون. جالپى، ەگىلمەگەن ادام سانىنىڭ ءوسۋى - ۇجىمدىق يممۋنيتەتتىڭ تومەندەۋىنە جانە حالىقتىڭ اراسىندا ۆاكسينامەن باسقارىلاتىن ينفەكسيالىق اۋرۋلاردىڭ تارالۋىنا الىپ كەلەدى»، - دەدى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس پەن «كەيبىر زاڭنامالىق اكتىلەرگە دەنساۋلىق ساقتاۋ ماسەلەلەرى بويىنشا تۇزەتۋلەر ەنگىزۋ جونىندە» ىلەسپە زاڭ جوباسىن تانىستىرعان مينيستر.
ونىڭ دەرەگىنشە، 2019 -جىلى قىزىلشا اۋرۋىمەن اۋىرعانداردىڭ اراسىندا 21 ءولىم، ونىڭ ىشىندە 19 بالا ءولىمى تىركەلگەن. ەلىمىزدە قىزىلشانىڭ ءورشۋى كەزىندە 13800 دەن استام جاعداي، بالالار اراسىندا - 9887 جاعداي تىركەلدى. سىرقات تانۋشىلىقتىڭ 83,4 پايىزى ەگىلمەگەن بالالاردىڭ اراسىندا تىركەلدى. 2018 -جىلعى 1-قاراشادان باستاپ 2019 -جىلعى 31-جەلتوقسانعا دەيىن - 8244 بالا اۋىردى.
«حالىق اراسىندا ۆاكسينامەن باسقارىلاتىن ينفەكسيالار جاعدايلارىن تىركەۋ وسال توپتارعا جاتاتىن بالالاردىڭ ومىرىنە قاۋىپ توندىرەدى. سونىمەن قاتار، اتالعان نورمانى جۇرتشىلىقپەن تالقىلاۋ ناتيجەسىندە پروفيلاكتيكالىق ەكپەلەر مىندەتتى جانە ەرىكتى بولىپ ءبولىندى. مىندەتتى پروفيلاكتيكالىق ەگۋلەرگە جوسپارلى پروفيلاكتيكالىق ەگۋلەر جانە ەپيدەميولوگيالىق كورسەتىلىمدەر بويىنشا پروفيلاكتيكالىق ەگۋلەر جاتادى. جوسپارلى ۆاكسينا الماعان بالالاردى مەكتەپكە دەيىنگى وقۋ مەكەمەلەرىنە جىبەرۋ - ۇجىمدىق يممۋنيتەتتىڭ شەكتى دەڭگەيىنە جەتكەن جاعدايدا عانا مۇمكىن بولادى»، - دەدى ەلجان ءبىرتانوۆ.
