ەلجان ءبىرتانوۆ باس سانيتار دارىگەرگە قانداي وكىلەتتىكتەر بەرىلەتىنىن ايتتى
بۇل تۋرالى ق ر پارلامەنتى سەناتىنىڭ جالپى وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم-جومارت توقايەۆ وسى جىلدىڭ 27-ساۋىرىندەگى مالىمدەمەسىندە كودەكس جوباسىنا حالىق دەنساۋلىعىن ساقتاۋ جانە سانيتارلىق- ەپيدەميولوگيالىق قىزمەت جۇيەسىن جاقسارتۋعا باعىتتالعان پراكتيكالىق ۇسىنىستار ەنگىزۋدى تاپسىردى. وسىلايشا كودەكس جوباسىندا باس مەملەكەتتىك سانيتار دارىگەرلەردىڭ شەكتەۋ ءىس- شارالارىن جانە كارانتيندى ەنگىزۋ جونىندەگى وكىلەتتىكتەرىن كۇشەيتۋ، حالىقتىڭ سانيتاريالىق- ەپيدەميولوگيالىق سالاماتتىلىعى سالاسىنداعى مەملەكەتتىك ورگاننىڭ لاۋازىمدى تۇلعالارىن الەۋمەتتىك قورعاۋ بويىنشا شارالار ەنگىزۋ، دەنساۋلىق ساقتاۋ مينيسترلىگىنە توتەنشە جاعدايدى ەنگىزۋ كەزەڭىندە مەديتسينالىق كومەك كورسەتۋدى ۇيىمداستىرۋ ءتارتىبىن ايقىنداۋ بويىنشا قۇزىرەت بەرۋ كوزدەلگەن»، - دەدى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس پەن «كەيبىر زاڭنامالىق اكتىلەرگە دەنساۋلىق ساقتاۋ ماسەلەلەرى بويىنشا تۇزەتۋلەر ەنگىزۋ جونىندە» ىلەسپە زاڭ جوباسىن تانىستىرعان مينيستر.
سونىمەن قاتار ونىڭ ايتۋىنشا، دەنساۋلىق ساقتاۋ سالاسىنداعى توتەنشە جاعدايدا جەدەل دەن قويۋ ماقساتىندا دارىلىك زاتتاردىڭ ساپاسى مەن قاۋىپسىزدىگىنە اسەر ەتەتىن جاعدايلار تۋىنداعان كەزدە فارماتسيەۆتيكالىق ينسپەكتسيا جۇرگىزۋ، مەملەكەتتىك- جەكەشەلىك ارىپتەستىكتى قولدانا وتىرىپ، دەنساۋلىق ساقتاۋ ينفراقۇرىلىمىن جاقسارتۋ كوزدەلەدى.
«كورسەتىلگەن تۇزەتۋلەردى قابىلداۋ ناتيجەسىندە اينالاداعىلارعا ءقاۋىپ توندىرەتىن اۋرۋدىڭ تارالۋ مۇمكىندىگى تومەندەيدى. الەۋمەتتىك قورعاۋ جانە سانيتارلىق-ەپيدەميولوگيالىق قاداعالاۋ قىزمەتىن نىعايتۋ، توتەنشە جاعداي كەزەڭىندە جەكەلەگەن مەديتسينالىق قىزمەتتەر كورسەتۋدى جەدەل ۇيىمداستىرۋ، دارىلىك زاتتاردىڭ ساپاسى مەن قاۋىپسىزدىگى قامتاماسىز ەتىلەدى. دەنساۋلىق ساقتاۋ سالاسىنداعى كونسەسسيالىق جوبالارىن تيىسىنشە ىسكە اسىرۋ جاقسارادى»، - دەدى ەلجان ءبىرتانوۆ.
