ءۇش اي مەرزىمگە جابىلعان ەيفەل مۇناراسى اشىلاتىن بولدى
ەسكە سالا كەتەيىك، مۇنارا فرانسيادا كورناۆيرۋستىڭ تارالۋىنا جول بەرمەۋ ماقساتىندا ەنگىزىلگەن كارانتينگە بايلانىستى ءۇش ايدان استام مەرزىمگە جابىلعان بولاتىن.
مۇنارا وپەراتورلارىنىڭ ايتۋىنشا، كوروناۆيرۋس جۇقتىرماس ءۇشىن جانە كەلۋشىلەر اراسىنداعى الەۋمەتتىك قاشىقتىقتى ساقتاۋ ءۇشىن مۇناراداعى ليفتىلەردى ازىرگە پايدالانۋعا تىيىم سالىنعان.
قوناقتار شىعىس باعانادان كوتەرىلىپ، باتىس باعاناسىنان تۇسىرىلەدى. جوعارعى بولىگى ازىرگە جابىق. ويتكەنى كەلۋشىلەردى ەكىنشى قاباتتان جوعارعى قاباتقا كوتەرەتىن ليفتىلەر وتە از. اكىمشىلىك كەلۋشىلەرگە بيلەتتەردى ونلاين كاسسادان ساتىپ الۋعا كەڭەس بەرەدى.
مالىمدەمەدە ايتىلعانداي، ادامدار بەلگىلەنگەن قاشىقتىقتا تۇرۋى ءۇشىن ەدەنگە بەلگى سالىنادى. قوناقتار ماسكا كيىپ كەلۋى كەرەك. كۇن سايىن نىساندا تازالاۋ جانە دەزينفەكسيا جۇمىستارى جۇرگىزىلەدى.
Covid-19 ينفەكسياسى تارالماس ءۇشىن ەنگىزىلگەن كارانتيننەن الەمدەگى تۋريستەر كوپ باراتىن ەلدەردىڭ ءبىرى فرانسيانىڭ تۋريزم يندۋسترياسى قاتتى زارداپ شەكتى. ەلدە قوناق ۇيلەر، مەيرامحانالار، مۇراجايلار مەن تەاترلار جۇمىسىن توقتاتقان بولاتىن. سونىمەن قاتار، فرانسيا استاناسىنداعى لۋۆر مۇراجايى مەن ۆەرسال سارايى سياقتى كورنەكتى ورىندار ۋاقىتشا جابىلعان-دى.
