قازاق حورەوگرافى تۇسىرگەن «كيەلى بي» فيلمى الەمدىك كينوفەستيۆالدە كورسەتىلەدى

نۇر-سۇلتان. قازاقپارات - قازاقستاندىق حورەوگراف تۇسىرگەن فيلم بەدەلدى كينوفەستيۆالدەر ىرىكتەۋىنە ءوتتى، دەپ حابارلايدى قازاقپارات 24.kz ارناسىنا سىلتەمە جاساپ.

«كيەلى بي» اتاۋىمەن شىققان ەكسپەريمەنتالدى ارت- كارتينا نيۋ-يورك قالاسىنداعى كونە Dance on Camera فەستيۆالىنە، سونداي-اق كانن كينوفەستيۆالىنىڭ بايقاۋدان تىس باعدارلاماسىنا ءوتتى. بۇل فيلم ماڭعىستاۋدا تۇسىرىلگەن.

«كيەلى ءبيدىڭ» تاماشا پەيزاجدارىنىڭ ءبىر وڭىردە ورنالاسقانىنا سەنۋ قيىن. كارتينا اۆتورلارى - فرانسيادا تۇرىپ جاتقان بالەرينا جانە حورەوگراف دانا مۇسا، سونداي-اق حالىقارالىق ەنتۋزياستار كومانداسى. كينوپەرفورمانس ولاردىڭ جەكە قاراجاتىنا جاسالىپ، ءبىرىنشى كورسەتىلىمى اقتاۋ قالاسىندا وتكەن. باستاماشىلاردىڭ ويىنشا، بۇل جوبا ادامنىڭ تابيعاتپەن جاقىندىعى، ايەل باستاۋىنىڭ ماڭىزى مەن كۇشى، سونداي-اق كوشپەلى حالىقتىڭ دەنە جانە رۋحىنىڭ ەركىندىگى جايىندا ەسكە سالۋى ءتيىس. بۇل تاقىرىپتا تۇسىرىلگەن ارت-تاجىريبە الەمدىك دەڭگەيدەگى كينوساراپشىلار اراسىندا سۇرانىسقا يە.

«بارلىق جوبالارىم ءبىر- بىرىنە ۇقساس - بۇل تابيعاتپەن بايلانىس، ايەل ەركىندىگى، ونىڭ ءوز دەنەسىمەن ۇيلەسىمدىلىگى. سەبەبى وندا مەنىڭ جەتى ارحەتيپىم بار، ونىڭ ءارقايسىسىندا مەن باياندايمىن، كورسەتەمىن، بيلەيمىن. بۇل مەن ءۇشىن وتە ماڭىزدى. ايەل دەنەسىنىڭ ءار بولىگى، ءاربىر سانتيمەترى - كيەلى، فيلمنىڭ «كيەلى بي» دەپ اتالۋى دا سوندىقتان»، - دەپ اتاپ ءوتتى فيلمنىڭ اۆتورى.