قىتاي وزگە ەلدەرمەن قاتىناسىن قالىپقا كەلتىرىپ جاتىر
ەندى قىتاي بيلىگى بىرتىندەپ وزگە ەلدەرمەن قاتىناسىن قالپىنا كەلتىرە باستادى. قىتاي بيلىگى 28 - ناۋرىزدا ۆيزاسى جانە تۇرۋعا ىقتيارحاتى بار شەتەلدىكتەرگە ەلگە كەلۋگە ۋاقىتشا تىيىم سالعان بولاتىن.
سالدارىنان كاسىپكەرلەر جۇمىسىنا قايتا الماي ءجۇر. ۇكىمەت وكىلدەرى شەكارانى اشۋ ماسەلەسى ەپيدەميولوگيالىق جاعدايعا بايلانىستى شەشىلەتىنىن حابارلاعان بولاتىن. ال ازىرگە تەك وڭتۇستىك كورەيا مەن سينگاپۋر ەلدەرىمەن ءوزارا قاتىناس قالپىنا كەلە باستادى.
ماجاوسيۋي، قىتاي سىرتقى ىستەر ءمينيسترىنىڭ ورىنباسارى:
- ءوندىرىس پەن تاۋارلاردى جەتكىزۋ بويىنشا حالىقارالىق جۇيەنىڭ قاۋىپسىزدىگى مەن تۇراقتىلىعىن قامتاماسىز ەتۋ ءۇشىن، سەنىمدى ادىستەردى قولدانا وتىرىپ، وزگە ەلدەرمەن اۋەقاتىناستى بىرتىندەپ قالپىنا كەلتىرىپ جاتىرمىز. سونداي- اق ماڭىزدى سالالارعا شۇعىل قاجەت قىزمەتكەرلەر ءۇشىن «جەدەل ترەكتەر» اشتىق. العاش رەت بۇل ءتاسىل وڭتۇستىك كورەيامەن بايلانىستا پايدالانىلدى. وسى نەگىزدە گەرمانيا جانە سينگاپۋرمەن دە جاڭا ءتارتىپ ەنگىزدىك. اراسىندا شاڭحاي مەن تيانجين بار قىتايدىڭ التى قالاسىنا سينگاپۋر ازاماتتارى جانە وندا تۇرعىلىقتى مەكەنى بار شەتەلدىكتەر كەلە الادى. الايدا قولدارىندا تەست ناتيجەلەرى بولۋى كەرەك. وعان قوسا قىتايعا قادام باسقاندا قايتا تەستتەن ءوتىپ، ەكى كۇندىك كارانتينگە ورنالاستىرىلادى.
ليۋ حۋاتسين، ق ح ر كوممەرتسيا مينيسترلىگى جانىنداعى حالىقارالىق ساۋدا جانە ەكونوميكالىق ىنتىماقتاستىق اكادەمياسىنىڭ عىلىمي قىزمەتكەرى:
- شەكاراداعى قاتاڭ شارالار قىتاي جانە ورتالىق ازيا ەلدەرى ازاماتتارى اراسىنداعى قاتىناستى شەكتەپ، ينۆەستيتسيالىق جوبالاردى جۇزەگە اسىرۋدى تەجەدى. كەدەن قىزمەتىنىنىڭ ستاتيستيكالىق مالىمەتىنە ساي قاڭتار مەن ءساۋىر ايلارى ارالىعىندا قىتايدىڭ وسى مەملەكەتتەرمەن ساۋدا بايلانىسى 17 پروتسەنتكە تومەندەگەن. ەگەر قازاقستانمەن نەبارى % 1,2- كە ازايسا، ايماقتاعى وزگە ەلدەرمەن بۇل كورسەتكىش شامامەن % 30- تەن اسىپ كەتتى.
قازاقستان ەلشىلىگىنىڭ مالىمەتىنشە، 2 مىڭنان اسا ازاماتىمىز قىتايدا كونسۋلدىق تىركەۋدە تۇر. بۇل نەگىزىنەن كومپانيا قىزمەتكەرلەرى مەن ستۋدەنتتەر. ىندەت ورشىگەن كەزدە كوبىسى قازاقستانعا ورالدى. ەندى ولار شەكارانىڭ اشىلۋىن كۇتىپ وتىر.
www.24.kz
