ادام ءولتىردى دەگەن كۇدىكپەن ىزدەۋدە بولعان وزبەكستاندىق اقتوبەدە ۇستالدى
اقتوبەلىك پوليتسەيلەر كىسى ولتىرگەنى ءۇشىن ىزدەۋدە جۇرگەن وزبەكستان ازاماتىن ۇستادى. 35 جاستاعى كۇدىكتىنى «سامارا- شىمكەنت» تاس جولىندا پاترۋلدىك پوليتسيا روتاسىنىڭ جاساعى قولعا ءتۇسىردى. ول شىمكەنتتەن اقتوبەگە قاراي جول تارتقان. پوليتسيا قىزمەتكەرلەرى ونىڭ قولىنداعى قاپشىقتان كۇدىكتەنىپ، توقتاتتى.
«وزبەكستان ازاماتىنىڭ قولىنداعى قاپشىقتا جەكە زاتتارىنان باسقا، بۇزاۋدىڭ باسى مەن ەتى تابىلعان. شىمكەنت قالاسىنان ىرعىز اۋدانىنا قاراي ءجۇرىپ، جولدا جايىلىپ جۇرگەن بۇزاۋدى جاسىرىن تۇردە ۇرلاپ كەتكەن. سويىپ، ەتتىڭ ءبىر بولىگىن جانە مالدىڭ باسىن قاپشىققا سالىپ العان. ۇستالعان ازامات ءوز ارەكەتىن مويىندادى. كۇدىكتىنىڭ جەكە باسىن تەكسەرۋ كەزىندە پوليتسيا قىزمەتكەرلەرى 2016 -جىلدان بەرى ىزدەۋدە جۇرگەنىن ءبىلدى. الماتى وبلىسىنىڭ پوليتسيا دەپارتامەنتىنىڭ اۋىر قىلمىس جاساعانى ءۇشىن حالىقارالىق ىزدەۋ جاريالانعانى انىقتالدى. كۇدىكتى ۇستالدى جانە ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جۇرگىزىلۋدە»، - دەپ حابارلادى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.
اۆتور: التىناي ساعىندىقوۆا
