ەكولوگيا مينيسترلىگى «وسىمدىك الەمى تۋرالى» زاڭ جوباسىن ازىرلەيدى

نۇر- سۇلتان. قازاقپارات - قازاقستاننىڭ ورمان شارۋاشىلىعىن دامىتىپ، جانۋارلار دۇنيەسىن بايىتۋدا قانداي ماسەلەلەر بار؟ بۇل سۇراققا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جاۋاپ بەردى، دەپ حابارلايدى قازاقپارات ءتىلشىسى.

«ەلدە ورمانداردى مولىقتىرۋ كولەمىنىڭ ارتۋى بايقالادى - 2018 -جىلى 52,7 مىڭ گەكتاردى قۇراسا، وتكەن جىلى 64 مىڭ گەكتارعا جەتتى. 4,6 مىڭ گەكتار الاڭدا ەلوردانىڭ جاسىل ايماعىن قۇرۋ بويىنشا جۇمىستار جۇرگىزىلگەن بولاتىن. اتىراۋ، كوكشەتاۋ، قاراعاندى، اقتوبە، قىزىلوردا، تۇركىستاننىڭ، وبلىس ورتالىقتارىنىڭ اينالاسىندا ۇقساس ايماقتار قۇرۋدى جوسپارلاۋدامىز. قازىردىڭ وزىندە جۇمىس جوبالارى ازىرلەندى. 2030 - جىلعا قاراي جاسىل ايماقتاردىڭ الاڭىن 68,0 مىڭ گەكتارعا جەتكىزۋ جوسپارلانۋدا»، - دەدى ماعزۇم مىرزاعاليەۆ بۇگىن ورتالىق كوممۋنيكاتسيالار قىزمەتىندە وتكەن حالىققا ونلاين ەسەپ بەرۋ بارىسىندا.

مينيستر سونىمەن قاتار ورمان ورتتەرىنىڭ الدىن الۋ جۇمىستارى جالعاسىپ جاتقانىن ايتادى. الايدا، قابىلدانعان شارالارعا قاراماستان، جىل باسىنان بەرى 16 مىڭ گەكتاردان استام اۋماقتا 191 ورمان ءورتى تىركەلگەن. كەلگەن شىعىن 1,8 ميلليارد تەڭگەنى قۇرادى.

«ورمان القاپتارىنىڭ جاعدايىنا قوعامدىق باقىلاۋ جۇرگىزۋگە ەل تۇرعىندارىن بارىنشا تارتۋ ءۇشىن ارنايى ۆەب- سايت ىسكە قوسىلدى. سەكسەۋىل ەكپەلەرىن ساقتاۋ دا ءبىز ءۇشىن ماڭىزدى سۇراق. 2019 -جىلى ارال تەڭىزىنىڭ قۇرعاعان تۇبىندە كورەي ورمان قىزمەتىمەن ءوزارا ءىس- قيمىل جاساۋ اياسىندا 5 مىڭ گەكتارعا ەگىلدى. وسى جىلى 2,5 مىڭ گەكتارعا وتىرعىزىلادى. سونداي- اق 2019 -جىلى الماتى، جامبىل، قىزىلوردا جانە تۇركىستان وبلىستارىندا 165,6 مىڭ سەكسەۋىل ەكپەلەرى جانە 23,5 مىڭ گەكتار سەكسەۋىل تۇقىمى وتىرعىزىلدى. تۇتاستاي العاندا، بيىل «وسىمدىك الەمى تۋرالى» زاڭ جوباسىن جانە 2030 -جىلعا دەيىنگى قازاقستاننىڭ بيولوگيالىق ارتۇرلىلىگىن ساقتاۋ تۇجىرىمداماسىن دايىندايمىز»، - دەدى ول.

اۆتور: ايان بەكەن ۇلى