اقتوبەنىڭ اۋداندارىندا كوروناۆيرۋس ينفەكسياسىن جۇقتىرعاندار نەگە كوبەيدى؟

اقتوبە. قازاقپارات - اقتوبە اۋداندارىنىڭ بارلىعىندا دەرلىك ۆيرۋس جۇقتىرعان ادامدار بار. تەك قوبدا اۋدانى عانا دەرتتەن امان، دەپ حابارلايدى قازاقپارات ءتىلشىسى.

سوڭعى تاۋلىكتە اقتوبە وبلىسىندا 26 ادام كوروناۆيرۋس ينفەكسياسىن جۇقتىردى. قازىر اۋدانداردا كوبەيىپ بارادى.

ماسەلەن، العا مەن ىرعىز، تەمىر اۋداندارىندا -3، بايعانيندە - 1، قارعالىدا - 2، مارتوكتە - 16، مۇعالجاردا - 15، شالقاردا - 24 ادامعا جەتتى.

بۇعان دەيىن شالقار قالاسىندا ەرەكشە شەكتەۋ شاراسى ەنگىزىلگەنىن حابارلاعان بولاتىنبىز.

«سوڭعى تاۋلىكتە ۆيرۋس جۇقتىرعان 19 ادام - اقتوبە قالاسىنان. شالقار اۋدانىندا - 2 ايەل، مۇعالجار اۋدانىندا - 3 ادام، ىرعىز جانە مارتوك اۋداندارىندا ءبىر ادامنان تىركەلگەن.

19 پاتسيەنت ج ر ۆ ي سيمپتومدارىمەن مەديتسينالىق كومەككە جۇگىنگەن. ال 4 ناۋقاس بۇعان دەيىن كوروناۆيرۋس انىقتالعان ادامدارمەن قارىم-قاتىناستا بولعان. 2 ادام ەپيدقاداعالاۋ، 1 ادام پروفيلاكتيكالىق ماقساتتا قارالعان»، - دەپ حابارلادى وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسپا ءسوز قىزمەتى.

بارلىق ناۋقاس جۇقپالى اۋرۋلار ستاتسيونارىنا جاتقىزىلعان. ولارمەن قارىم-قاتىناستا بولعان ادامدار مەديتسينالىق باقىلاۋعا الىندى.

ايتا كەتەيىك، اقتوبە وبلىسىندا كوروناۆيرۋس ينفەكسياسىمەن جالپى 427 ادام تىركەلگەن، ونىڭ 244 ى جازىلىپ شىققان.