قازاقستاندىقتار كولىكتەرىن جەكە كۋالىكپەن عانا قاشان باسقارا الادى

نۇر- سۇلتان. قازاقپارات – ق ر ىشكى ىستەر ءمينيسترى ەرلان تۇرعىمبايەۆ قازاقستاندىق جۇرگىزۋشىلەردەن جەكە كۋالىكتەن باسقا قۇجات قاشاننان باستاپ تالاپ ەتىلمەيتىنىن ايتتى، دەپ حابارلايدى قازاقپارات ءتىلشىسى.

«اۆتوكولىك قۇرالدارىنا قاتىستى قۇجاتتار، جۇرگىزۋشى كۋالىگى بويىنشا ەل پرەزيدەنتى قاسىم- جومارت توقايەۆ كوكتەمدە باعدارلاما ازىرلەۋدى تاپسىرعان ەدى. ءبىز ونى ينتەگراتسيالادىق. بۇگىنگى كۇنى ول بىزدە بار. توتەنشە جاعداي كەزىندە بلوكپوستاردا ءبىز ونى تولىقتاي سىناقتان وتكىزدىك»، - دەدى ەرلان تۇرعىمبايەۆ ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، بۇگىندە جول پوليتسيا قىزمەتكەرلەرىنىڭ قولىندا 13 مىڭ ەلەكتروندىق پلانشەت بار. اتالعان ەلەكتروندىق قۇرىلعىدا جەكە تۇلعا، كولىك قۇرالى، ساقتاندىرۋ كومپانياسى، كولىكتىڭ تەحنيكالىق تەكسەرۋدەن وتكەندىگى تۋرالى قۇجات جانە حالىققا قىزمەت كورسەتۋ ورتالىقتارى مەن «ازاماتتارعا ارنالعان ۇكىمەت» مەملەكەتتىك كورپوراتسياسىندا بار وزگە دە تىركەۋ قۇجاتتارىنىڭ بازاسى ينتەگراتسيالانعان.

«بۇگىنگى كۇننىڭ وزىندە- اق ءبىز تەحنيكالىق تۇرعىدان وعان كوشىپ كەتۋگە دايىنبىز»، - دەدى ول.

دەگەنمەن، مينيستر ول ءۇشىن زاڭنىڭ كەيبىر نورمالارىن قاراستىرۋ قاجەتتىگىن جانە ولاردىڭ قازىرگى ۋاقىتتا ماجىلىستەگى جۇمىس توپتارىندا قاراستىرىلىپ جاتقانىن ايتتى.

«ەگەر جىل سوڭىنا دەيىن زاڭ جوباسى پارلامەنتتەن وتەتىن بولسا، وندا 2021 -جىلدىڭ 1 - قاڭتارىنان باستاپ جەكە كۋالىكتەن باسقا ەشقانداي قۇجات الماستان كولىك قۇرالىمەن جۇرە بەرۋگە بولادى»، - دەدى ەرلان تۇرعىمبايەۆ.

اۆتور: مارلان جيەمباي