قازاقستاندا سينتەتيكالىق ەسىرتكى ساۋداسى بەلەڭ الۋدا
بۇل تۋرالى بۇگىن ق ر ىشكى ىستەر ءمينيسترى ەرلان تۇرعىمبايەۆ ەسەپ بەرۋ كەزدەسۋى بارىسىندا ايتتى، دەپ حابارلايدى قازاقپارات ءتىلشىسى.
«ەسىرتكى قىلمىسىنا قارسى كۇرەس بويىنشا ناقتى جۇمىستار جۇرگىزىلىپ جاتىر. جىل باسىنان بەرى 1 مىڭنان استام ەسىرتكى قىلمىسى، ونىڭ ىشىندە 748 ساتۋ جانە 49 كونتراباندا فاكتىسى انىقتالدى. ەسىرتكى بيزنەسى سالاسىندا 3 ۇيىمداسقان قىلمىستىق توپتىڭ ارەكەتى تىيىلدى. زاڭسىز اينالىمنان 1,5 توننا ەسىرتكى الىندى»، - دەدى مينيستر.
ونىڭ ايتۋىنشا، ەلىمىزگە كەلەتىن گەروين كولەمىنىڭ قىسقارۋىنا بايلانىستى سينتەتيكالىق ەسىرتكى كەڭىنەن تارالا باستادى. وسى جىلدىڭ وزىندە سينتەتيكالىق ەسىرتكى اينالىمىنا قاتىستى 261 فاكتى انىقتالىپ وتىر.
«مۇنداي 26 كەلىدەن استام ەسىرتكى تاركىلەندى. بۇل وتكەن جىلدىڭ ءدال وسىنداي كەزەڭىمەن سالىستىرعاندا 5,5 ەسە كوپ. سينتەتيكالىق ەسىرتكى دايىندالۋ جانە ساتۋ تۇرعىسىنان ارزاندىعىمەن ەرەكشەلەنەدى. جىلدىڭ باسىنان بەرى جاسىرىن 3 ەسىرتكى زەرتحاناسى انىقتالىپ، جابىلدى»، - دەدى ول.
ءمينيستردىڭ ايتۋىنشا، ەسىرتكى ساتۋشىلار ينتەرنەت-رەسۋرستار مەن ەلەكتروندى تولەم جۇيەسىنىڭ مۇمكىنشىلىكتەرىن بەلسەندى پايدالانادى. وسىعان بايلانىستى اتالعان تەحنولوگيالاردى قولدانۋ ارقىلى ەسىرتكى قىلمىسىن جاساعاندارعا جاۋاپكەرشىلىك قاتاڭداتىلعان.
«قابىلدانعان شارالاردىڭ ارقاسىندا مۇنداي 500 ەلەكتروندى رەسۋرس انىقتالىپ، 234 ەسىرتكى سايتتارىنىڭ ەلەكتروندى مەكەن جايى كورسەتىلگەن گراففيتي- جازبا ءوشىرىلدى»، - دەدى ەرلان تۇرعىمبايەۆ.
