روزا مۇقانوۆا: دراماتۋرگيانىڭ ەرەكشەلىگى - جان مەن سانانىڭ ارپالىسىن كورسەتە بىلۋىندە

نۇر-سۇلتان. قازاقپارات - بۇل تۋرالى «اۋىل» حالىقتىق-دەموكراتيالىق پاتريوتتىق پارتياسىنىڭ ۇيىمداستىرعان «اۋىلىم - التىن تۇعىرىم» ءداستۇرلى ادەبي-ونلاين كونكۋرسىنىڭ جەڭىمپازدارىن ماراپاتتاۋ سالتاناتىندا ايتىلدى، دەپ حابارلايدى قازاقپارات ءتىلشىسى.

«پروزا» اتالىمى بويىنشا ءبىرىنشى ورىن رەتبەك ماعازعا، ەكىنشى ورىن جادىرا شامۇراتوۆاعا، ءۇشىنشى ورىن اباي ايماعانبەتوۆكە بۇيىردى. بۇل اتالىمدا ءابىش كەكىلبايەۆ اتىنداعى ارنايى جۇلدەمەن - ءاليحان جاقسىلىق، اقان نۇرمانوۆ اتىنداعى ارنايى جۇلدەمەن - اباي وراز، راقىمجان وتاربايەۆ اتىنداعى ارنايى جۇلدەمەن - اسىلان قۋانىش ۇلى، «اۋىل» پارتياسىنىڭ ارنايى جۇلدەسىمەن - ءرۇستام گاسىموۆ ماراپاتتالدى.

«قالىپتاسقان سۋرەتكەر بولماسا، دراماتۋرگياعا اياق باسۋ قيىن. بيىل وسى جانردا توعىز شىعارما قاتىستى. دراماتۋرگ بولۋ ءۇشىن ادامنىڭ جانىن تەرەڭ ءتۇسىنۋ كەرەك. قالىپتاسىپ قالعان داستۇرگە جاننىڭ كەلىسپەۋى «دراماتۋرگياداعى كونفليكت» دەپ اتالادى. جانردىڭ ەرەكشەلىگى - جان مەن سانانىڭ ارپالىسىندا»، - دەيدى جازۋشى-دراماتۋرگ، قازىلار مۇشەسى روزا مۇقانوۆا.

بيىلعى «التىن تۇعىر» بەلگىسىنىڭ يەگەرىنە ابايدىڭ 175 جىلدىعىنا وراي قوسىمشا اقشالاي سىيلىق تاعايىندالدى.

بۇل سىيلىققا «دراماتۋرگيا» اتالىمى بويىنشا ءبىرىنشى ورىن يەگەرى توكەن الجانتەگى قول جەتكىزدى. اتالىمنىڭ ەكىنشى ورنى - الىبەك بايبولوۆقا، ءۇشىنشى ورىن - ءادىلحان اسانوۆقا بۇيىردى.

«دراماتۋرگيا» اتالىمى بويىنشا دا ارنايى جۇلدەلەر تاعايىندالىپ، باققوجا مۇقاي اتىنداعى ارنايى جۇلدەمەن - ديدار امانتاي، قاليحان ىسقاق اتىنداعى ارنايى جۇلدەمەن - سوۆەتحان قازيەۆ، ساكەن ءجۇنىسوۆ اتىنداعى ارنايى جۇلدەمەن - وتەن احمەت ماراپاتتالدى. بايقاۋعا ۇسىنىلعان شىعارمالارعا بەلگىلى قوعام قايراتكەرلەرى، تانىمال اقىن-جازۋشىلار مەن ادەبيەتتانۋشى عالىمداردان قۇرالعان قازىلار القاسى تورەلىك ەتتى.