ساۋلە قيسىقوۆا ەلوردادا كارانتيندى كۇشەيتۋگە قاتىستى پىكىر ءبىلدىردى

نۇر- سۇلتان. قازاقپارات - نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلوردادا كارانتيندى كۇشەيتۋ مۇمكىندىگى تۋرالى سۇراققا جاۋاپ بەردى، دەپ حابارلايدى قازاقپارات ءتىلشىسى.

«بۇگىندە كارانتيندى كۇشەيتۋ شارالارى نەگىزىنەن ءار وڭىردەگى ەپيدەميولوگيالىق جاعدايعا بايلانىستى. شىنىمەن دە، نۇر-سۇلتان قالاسىندا زەرتحانالىق تۇردە كوروناۆيرۋس راستالعان ادامدار سانى ءوستى. مۇنى ەلوردادا كوروناۆيرۋس ينفەكسياسىنىڭ پ ت ر دياگنوستيكاسىنا زەرتتەۋ جۇرگىزەتىن 7 زەرتحانا قىزمەت ەتىپ جاتقانىمەن تۇسىندىرۋگە بولادى»، - دەدى س. قيسىقوۆا «حابار24» ارناسىنا بەرگەن سۇحباتىندا.

ونىڭ سوزىنە قاراعاندا، كۇن سايىن 4 تەن 5 مىڭعا دەيىن تەستىلەۋ جۇرگىزىلەدى.

«سايكەسىنشە، تەست جۇرگىزۋ ارتسا، وندا ىندەت جۇقتىرعانداردى انىقتاۋ دا كوبەيەتىنى تۇسىنىكتى. اتاپ وتسەك، وسى ينفەكسيا تابىلعان ادامداردىڭ ىشىندە 60-70 پايىزىندا سيمپتومسىز دارەجەدە بولادى. سوندىقتان ەپيدەميولوگيالىق جاعدايدى ەسكەرە وتىرىپ، كارانتين شارالارىن كۇشەيتۋ تۋرالى شەشىمدى باس مەملەكەتتىك سانيتار دارىگەرى قابىلدايدى»، - دەدى باسقارما باسشىسى.