ۇكىمەت باسشىسى: ءبىزدىڭ مىندەتىمىز - ەكونوميكالىق داعدارىسقا دەيىنگى دامۋ قارقىنىن قالپىنا كەلتىرۋ

نۇر- سۇلتان. قازاقپارات - پرەمەر- مينيستر اسقار مامين ۇكىمەتتىڭ باستى مىندەتى - قىسقا مەرزىم ىشىندە ەكونوميكالىق داعدارىسقا دەيىنگى دامۋ قارقىنىن قالپىنا كەلتىرۋ ەكەنىن مالىمدەدى، دەپ حابارلايدى قازاقپارات ءتىلشىسى.

«ەلىمىزدە توتەنشە جاعدايدىڭ اياقتالعانىنا ءبىر ايعا جۋىق ۋاقىت ءوتتى. كارانتيندىك رەجيم كەزەڭ- كەزەڭىمەن جەڭىلدەتىلۋدە. قازىرگى تاڭدا ەكونوميكالىق جاعداي تۇراقتالىپ كەلەدى. ناقتى سەكتور ءوسىمنىڭ سەنىمدى سەرپىنىن كورسەتىپ وتىر. تاۋ- كەن ونەركاسىبىندە 5,2 پايىز، وڭدەۋشى سالادا 4,9 پايىز، ونىڭ ىشىندە ماشينا جاساۋدا 18,5 پايىز، فارماتسيەۆتيكادا 21,2 پايىز، جەڭىل ونەركاسىپتە 10,8 پايىز، قۇرىلىس ماتەريالى وندىرىسىندە 2,3 پايىز ءوسىم بايقالدى. قۇرىلىس كولەمى 5,9 پايىزعا ءوسىپ، ينۆەستيتسيالاردىڭ ءوسۋ قارقىنىن بىلتىرعى دەڭگەيدە ۇستاپ قالدىق. ساۋدا بالانسىنىڭ وڭ سالدوسى قامتاماسىز ەتىلدى»، - دەدى اسقار مامين ۇكىمەت وتىرىسىندا.

پرەمەر- مينيستر سونىمەن قاتار قىزمەت كورسەتۋ سالاسىندا ىسكەرلىك بەلسەندىلىك قارقىندى تۇردە قالپىنا كەلىپ جاتقانىن ايتىپ ءوتتى.

«ساۋدا سالاسىندا مامىردا ساۋىرمەن سالىستىرعاندا 28,3 پايىز، كولىك سالاسىندا 20,7 پايىز، حالىققا قىزمەت كورسەتۋدە 28,8 پايىزعا ايتارلىقتاي ءوسىمدى بايقاۋعا بولادى. ءبىزدىڭ مىندەتىمىز - قىسقا مەرزىمدە ەكونوميكالىق داعدارىسقا دەيىنگى دامۋ قارقىنىن قالپىنا كەلتىرۋ. بۇعان ەكونوميكانى قولداۋ ماقساتىندا قابىلدانعان شۇعىل شارالار جانە بيىل جىل سوڭىنا دەيىن ەكونوميكانى قالپىنا كەلتىرۋ جونىندەگى كەشەندى جوسپاردى ىسكە اسىرۋ ىقپال ەتۋى كەرەك»، - دەدى اسقار مامين.