مۇناي باعاسى قايتادان وسە باستادى - ەربولات دوسايەۆ
«بيىل مامىردا سىرتقى نارىقتاردا كوپتەگەن ەلدە كوروناۆيرۋستىڭ ءوسىمىنىڭ تومەندەۋىنە جانە بىرتىندەپ كارانتيننەن شىعۋعا بايلانىستى جاعىمدى كوڭىل- كۇي باسىم بولدى. كارانتين شارالارىن باسەڭدەتۋ ەكونوميكالىق بەلسەندىلىكتىڭ جانە ەنەرگيا رەسۋرستارىنا سۇرانىستىڭ قايتا جاڭعىرۋىنا ىقپال ەتىپ وتىر. وپەك+ مۇناي ءوندىرىسىن قىسقارتۋ تۋرالى ۋاعدالاستىعىن ىسكە اسىرۋ ەسەبىنەن مۇناي نارىعىنداعى تەڭگەرىمدىلىك بىرتىندەپ رەتتەلۋدە. مامىردا مۇنايعا باعا بەلگىلەۋ ءبىر باررەل ءۇشىن 25,3 ا ق ش دوللارىنان 35,3 ا ق ش دوللارىنا دەيىن، ياعني %39,8 عا ءوستى. ال 8 ماۋسىمداعى جاعداي بويىنشا الەمدىك نارىقتاردا مۇنايدىڭ ءبىر باررەلى 40,8 ا ق ش دوللارى دەڭگەيىندە جابىلدى»، - دەدى ەربولات دوسايەۆ ۇكىمەت وتىرىسىندا.
ۇلتتىق بانك ءتوراعاسىنىڭ ايتۋىنشا مەملەكەتتەردىڭ كوبى كارانتين شارالارىن الىپ تاستاي باستاعان.
«ماسەلەن، Global PMI Manufacturing يندەكسى 2020 -جىلعى مامىردا 39,6 دان 42,4 كە دەيىن ءوستى. تومەندەۋ بارلىق كورسەتكىشتەر - شىعارۋ كولەمى، جاڭا تاپسىرىستار، جاڭا ەكسپورتتىق تاپسىرىستار جانە جۇمىسپەن قامتۋ بويىنشا باياۋلادى. كەيبىر جاندانۋ بەلگىلەرىن ءبىز قازاقستان ەكونوميكاسىندا دا ۇلتتىق بانك اي سايىن باعالايتىن ىسكەرلىك بەلسەندىلىك يندەكسى نەگىزىندە كورىپ وتىرمىز. 447 ءىرى، ورتا جانە شاعىن كاسىپورىنعا جۇرگىزىلگەن پىكىرتەرىم ناتيجەسى بويىنشا ونەركاسىپتە، قۇرىلىستا جانە قىزمەت كورسەتۋ سالاسىندا ىسكەرلىك بەلسەندىلىك يندەكسى ساۋىردەگى 37,2 تارماقپەن سالىستىرعاندا مامىردا 44,0 تارماققا دەيىن ءوستى. ءبىراق ءالى دە 50 تارماق بەلگىسىنەن تومەن بولىپ قالىپ وتىر»، - دەدى ول.
ەربولات دوسايەۆتىڭ ايتۋىنشا جاعدايدىڭ ەداۋىر جاقسارۋى قىزمەت كورسەتۋ سالاسىندا بايقالادى.
