نۇر- سۇلتان قالاسىنداعى كوروناۆيرۋس جۇققانداردى قالاي ەمدەپ جاتىر

نۇر- سۇلتان. قازاقپارات - كوروناۆيرۋس جۇقتىرعانداردى قالاي ەمدەيدى؟ ينفەكتسيامەن كۇرەسەتىن دارىگەرلەر قانشالىقتى قورعالعان.

«حابار 24» تەلەارناسىنىڭ تىلشىلەرى ەلورداداعى كوپبەيىندى مەديتسينا ورتالىعىنا بارىپ، وسى جاعدايعا كوز جەتكىزدى، دەپ حابارلايدى قازاقپارات.

«ءبىز قازىر دارىگەرلەردىڭ كيىم اۋىستىراتىن بولمەسىندە تۇرمىز. مىنا جەردە اق حالاتتىلار دۋشقا تۇسەدى. سودان كەيىن بارىپ ولار ارنايى قورعانىس قۇرالدارىن كيەدى. قازىر بارلىق پروتسەستى باسىنان اياعىنا دەيىن كورەتىن بولاسىزدار» ، - دەيدى ءتىلشى عازيزا مۇحامەدجانوۆا.

شومىلىپ جەكە زاتتارىن ارنايى بولمەگە قالدىرعاننان كەيىن دارىگەرلەر وسىنداي قورعانىش قۇرالدارىن كيەدى.

قازىر ءبىز مىناداي اياق كيىم كيەمىز. شىنىمدى ايتسام، كوستيۋمنىڭ ءىشى وتە ىستىق. ءبىراق دارىگەرلەردىڭ قاۋىپسىزدىگى ءبىرىنشى ورىندا. وسى ازىرلىكتەن كەيىن دارىگەرلەر كوۆيد-19 جۇقتىرعان ناۋقاستار جاتقان بولىمگە بارۋعا دايىن بولادى. ايتا كەتەرلىگى دارىگەرلەر وسىنداي قورعانىش كيىىمن كيىپ كۇنىنە كەم دەگەندە 4 ساعات جۇرەدى. قالالىق ينفەكتسيالىق اۋرۋحانانىڭ جانساقتاۋ بولىمىندە قازىر 17 ادام جاتىر. 7 ناۋقاستا كوروناۆيرۋس راستالعان. ولاردىڭ تورتەۋى جاساندى تىنىس الۋ اپپاراتىنا قوسىلعان. ناۋقاستاردى ەمدەۋگە بىلىكتى مامانداردىڭ بارلىعى تارتىلعان. اۋرۋحانادا ايلاپ قىزمەت ەتكەن دارىگەرلەردىڭ جاقىندارىن كورمەگەنىنە دە ءبىراز بولعان.

«ءبىز تاڭەرتەڭ كەلەمىز. جۇمىستى قابىلداپ الامىز دا كىرىسەمىز. اپپاراتقا قوسىلعان ادامداردى ءبىرىنشى ءمان بەرىپ، ولاردىڭ جاعدايىن قارايمىز. قان قىسىمىن، قان قۇرامىنا تالداۋ ناتيجەسىن جاسايمىز ءوزىمىز. كەيبىرەۋىن زەرتحاناعا جىبەرەمىز» ، - دەيدى رەانيماتولوگ دارىگەر ەركىنبەك ساعاديەۆ.

كوروناۆيرۋس جۇقتىرعانداردان بولەك، بۇل اۋرۋحانادا پنيەۆمونيامنىڭ اۋىر تۇرىنە شالدىققان ناۋقاستار بار. دارىگەرلەردىڭ ايتۋىنشا، ولار دا ىندەتكە شالدىققان بولۋى مۇمكىن. بۇل ناۋقاستاردان ارنايى سىناما الىنىپ تەكسەرۋگە جىبەرىلەدى.

«جالپى قازىر ەمحانادا 400 گە جۋىق ادام ەم الىپ جاتىر. ەپيدەميا باستالعالى مىڭنان استام ناۋقاستى ەمدەپ شىقتىق»، - دەيدى قالالىق كوپ بەيىندى مەديتسينا ورتالىعىنىڭ يزولياتورىنىڭ جاۋاپتى باسشىسى تاتيانا تسىچويەۆا.

وكىنىشكە وراي، ءتۇسىرىلىم توبى بارعان ساتتتە جانساقتاۋ بولىمىندە تاعى ءبىر ادام كوز جۇمدى. رەسمي اقپارات، زەرتحالالىق تەكسەرۋدەن كەيىن عانا جاريالانادى.