كارانتين تالاپتارى قايتا كۇشەيتىلىپ جاتقان الماتى وبلىسىندا بلوكپوستار قويىلمايدى

تالدىقورعان. قازاقپارات - كارانتين تالاپتارى قايتا كۇشەيتىلىپ جاتقان الماتى وبلىسىندا بلوك، سانيتارلىق پوستار قايتا قويىلمايدى.

بۇل تۋرالى ءوڭىردىڭ باس مەملەكەتتىك سانيتارلىق دارىگەرى قايرات بايمۇحامبەتوۆ ايتتى، دەپ حابارلايدى قازاقپارات ءتىلشىسى.

ونىڭ سوزىنشە، قاتاڭداتۋ شارالارى ءتۇرلى وبەكتىلەردىڭ جۇمىس ۋاقىتىن قىسقارتۋعا عانا اسەر ەتەدى. ەندى، بازارلار تۇسكى ۇشكە دەيىن، ءدامحانا سىندى قوعامدىق تاماقتانۋ ورىندارى تۇنگى ون بىرگە دەيىن جۇمىس ىستەيدى. سونداي- اق، باسسەيندەر مەن سۋ بۇرقاقتاردىڭ جۇمىسى توقتاتىلعان. قازىر الماتى وبلىسىندا كوروناۆيرۋس احۋالى 5,5 پايىزدى كورسەتىپ تۇر. ال وڭىردە كارانتين تالاپتارىن جەڭىلدەتۋدى باستاعاندا بۇل كورسەتكىش 2 پايىزدان ءارى اسپاعان. ەستەرىڭىزگە سالا كەتەيىك، وڭىردە كارانتين تالاپتارى قايتا كۇشەيتىلۋى مۇمكىن ەكەنىن بۇعان دەيىن حابارلاعان بولاتىنبىز.