بيزنەس باستاعىسى كەلگەن ەلوردالىقتارعا قايتارىمسىز گرانتتار بەرىلدى
بۇل تۋرالى ەلوردا تۇرعىندارىن جۇمىسپەن قامتۋ ماسەلەسى تاقىرىبىندا وتكەن ونلاين باسپا ءسوز كونفەرەنتسياسىندا ايتىلدى، دەپ حابارلايدى قازاقپارات ءتىلشىسى.
«بيىل حالىقتى جۇمىسپەن قامتۋ ورتالىعىنا شاعىن نەسيەلەۋ بويىنشا كەڭەس الۋعا 65 ادام ءوتىنىش بىلدىرگەن. ونىڭ ىشىندە 39 ءوتىنىش بەرۋشىگە تۇسىنىكتەمە بەرىلىپ، 26 سى بويىنشا ەكىنشى دەڭگەيلى بانكتەرگە شاعىن نەسيە بەرۋگە جولداما بەرىلدى. كاسىپتىك وقىتۋ جۇمىس بەرۋشىلەر مالىمدەگەن بىلىكتىلىكتەر مەن داعدىلار بويىنشا جۇزەگە اسىرىلادى. قىسقا مەرزىمدى كاسىپتىك وقىتۋ توپتاردىڭ جيناقتالۋىنا قاراي جۇزەگە اسىرىلادى. قىسقا مەرزىمدى كاسىپتىك وقىتۋدىڭ ۇزاقتىعى بىلىكتىلىك ەرەكشەلىكتەرى مەن داعدىلارىنا بايلانىستى 6 ايدان اسپايدى. بۇگىنگى تاڭدا 17 ماماندىق بەكىتىلدى، ولار: اسپاز، ناۋبايشى، كونديتەر، تىگىنشى، تىگىنشى- شەبەر، شاشتاراز شەبەرى، باقىلاۋشى كاسسير، انيماتسيا جانە ۆيدەوگرافيكا، تاربيەشىنىڭ كومەكشىسى، جيھاز جيناۋشى، اعاش سىرلاۋ تسەحىنىڭ شەبەرى، ارماتۋرشى، مونتاجشى، گاز جابدىعىن پايدالانۋ جانە جوندەۋ سلەسارى، گاز ەلەكتر دانەكەرلەۋشى، ەلەكتروسلەسار، جارتىلاي اۆتوماتتى ماشينادا ەلەكتر دانەكەرلەۋشى» ، - دەيدى «نۇر- سۇلتان قالاسى اكىمدىگىنىڭ حالىقتى جۇمىسپەن قامتۋ ورتالىعى» ك م م جۇمىسقا ورنالاسۋعا جاردەمدەسۋ ءبولىمىنىڭ جەتەكشىسى ازامات بايتاسوۆ.
ونىڭ ايتۋىنشا، بيزنەس- يدەيالاردى ىسكە اسىرۋعا ارنالعان مەملەكەتتىك گرانتتار ءوز ءىسىن اشۋدى جوسپارلاپ وتىرعان باعدارلاماعا قاتىسۋشىلارعا تەگىن جانە قايتارىمسىز نەگىزدە 200 ا ە ك- كە دەيىنگى مولشەردە بەرىلەدى.
«قاتىسۋشىلار - «ەڭبەك» باعدارلاماسى اياسىندا قىسقا مەرزىمدى كاسىپتىك وقۋدى اياقتاعان جۇمىسسىزدار، كاسىپكەرلەر مەن «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ كۋرسىنان وتكەن، قر سالىق زاڭناماسىنا سايكەس ءبىرىڭعاي جيىنتىق تولەمدى تولەگەن تۇلعالار. گرانت الۋ ءۇشىن حالىقتى جۇمىسپەن قامتۋ ورتالىعىنا بارىپ، كەڭەس الىپ، بارلىق قاجەتتى قۇجاتتارمەن بىرگە ءوتىنىش بەرۋ قاجەت. جىل باسىنان بەرى 300 دەن استام ازامات گرانتقا قۇجات تاپسىرىپ، 64 ازامات گرانتقا يە بولدى»، - دەيدى ول.
