ۆيرۋستىڭ تارالۋى ازايعانىمەن ماقتانعان يزرايلدە دەرت قايتادان ءورشىدى
قازىر ۇكىمەت بۇل ماسەلەنىڭ شەشىمىن ىزدەپ وتىر. ۇكىمەتتىڭ ازاماتتاردىڭ سانالىلىعىنا ارتقان سەنىمى اقتالعان جوق. سوڭعى تاۋلىكتە كوروناۆيرۋستى 160 ادام جۇقتىرىپ، ۇشەۋى قايتىس بولدى. تۇراقتالا باستاعان ەپيدەميولوگيالىق احۋال قايتا ۋشىعىپ، بيلىك دابىل قاقتى. جۇرت اراقاشىقتى ساقتاماي، بەتپەردە تاقپاي ءجۇر.
موشە بار- سيمانتوۆ، يزرايل دەنساۋلىق ساقتاۋ مينيسترلىگىنىڭ باس ديرەكتورى:
- سوڭعى كۇندەرى اۋرۋدى جۇقتىرۋ سانى ارتقانىن كورىپ تۇرمىز. بۇل جەكە- دارا وقيعالار دەگەن ءۇمىتىمىز بولعان ەدى، ءبىراق بۇل ەلدىڭ بۇكىل اۋماعىندا بايقالىپ تۇرعان ءۇردىس. سونداي- اق كۇن سايىن وتكىزەتىن تەستىلەۋ بارىسىندا وزگەرىس بار. ەگەر بۇرىن جارتى پروتسەنتىندە اۋرۋ انىقتالسا، قازىر بۇل كورسەتكىش ءبىر جارىم پروتسەنتكە ارتتى.
ەكى اپتا بۇرىن اشىلعان وقۋ ورىندارى قايتادان قاشىقتان وقىتۋعا اۋىسا باستادى. كوبىسى ونىڭ جارتىلاي ءتۇرىن ەنگىزدى. وقۋشىلارىنىڭ جارتىسى ءبىلىم وردالارىنا بارسا، قالعاندارى ۇيىندە وقيدى. اپتا سايىن اۋىسىپ تۇرادى.
بينيامين نەتانياحۋ، يزرايل پرەمەر- ءمينيسترى:
- ەشقانداي قاۋىپ جوق دەپ جۇرگەندەر حالىقتى الداپ، قوعام دەنساۋلىعى مەن كوپتەگەن ادامنىڭ ومىرىنە قاۋىپ ءتوندىرىپ تۇر. ءبىر جاعىنان سوڭعى 8 كۇندە ىندەتتىڭ ءورشۋى شەكتەۋلەردىڭ جەڭىلدەتىلۋى مەن ەكونوميكا جۇمىسىنىڭ قايتا باستالۋىنا بايلانىستى. الايدا باستى سەبەبى ماسكا تاعۋ، اراقاشىقتىق ساقتاۋ جانە گيگيەنا ەرجەلەرىن ەلەمەۋ بولىپ وتىر. سوندىقتان كوروناۆيرۋستان تۋىنداعان داعدارىستى ەڭسەرۋ بويىنشا مينيسترلەر كوميسسياسىن شاقىرتتىم. اۋرۋدى جۇقتىرۋ سانىن ازايتۋ ءۇشىن قانداي شارا قابىلداۋ كەرەكتىگىن تالقىلايمىز.
ۇكىمەت ىندەتتىڭ ءالى اياقتالماعانىن، ال كارانتين شارالارىنىڭ تولىق الىنىپ تاستالماعانىن، تەك جەڭىلدەتىلگەنىن باسا ايتادى. حالىقتىڭ شەكتەۋلەردەن شارشاعانىن ءتۇسىنىپ وتىرعان بيلىك، ءبارىبىر تۇرعىنداردى قاۋىپسىزدىك تالاپتارىن ساقتاۋعا شاقىرادى. دەنساۋلىق ساقتاۋ ءمينيسترى جۇرت ءتارتىپ ساقتاماسا، قاتاڭ كارانتيندىك شارالار بۇل جولى ۇزاققا سوزىلاتىنىن ەسكەرتتى.
www.24.kz
