ارىستاعى ەگىستىك القاپتارىنان وق- ءدارى قالدىقتارى تابىلدى
«قۇلاعان وق- ءدارى ءىزى تابىلعان جاعدايدا، شۇڭقىردا وق- ءدارى قالدىقتارىنىڭ بار- جوعى تەكسەرىلەدى. مۇندايدا 5 مەترگە دەيىنگى تەرەڭدىكتى قامتي الاتىن بومبا ىزدەۋ قۇرالى قولدانىلادى. ولار ءوزىنىڭ تيىمدىلىگىن كورسەتتى. ەگىستىك القاپتارىن تەكسەرۋ بارىسىندا 1,5 مەتردەن 3 مەترگە دەيىن جەرگە كىرىپ كەتكەن 200-دەن استام وق- ءدارى قالدىعى تابىلىپ، الىندى»، - دەدى قورعانىس ءمينيسترىنىڭ ورىنباسارى.
ونىڭ اتاپ وتۋىنشە، قاۋىپسىزدىك شارالارىن ساقتاۋ جانە جارىلۋ قاۋپى بار قالدىقتاردى جويۋ بارىسىندا وق- ءدارىنى ارنايى شۇڭقىرعا قويۋ جۇمىستارى ايرىقشا ساقتىقپەن جۇرگىزىلەدى. بۇل، ولاردىڭ جان- جاققا ۇشۋىنا جول بەرمەۋ ماقساتىندا جاسالادى. بۇعان قوسا، جارۋ جۇمىستارىن جۇرگىزەتىن توپتىڭ كومانديرى جارىلعىش زاتتاردىڭ زارياد قۋاتىن ناقتى ەسەپتەپ، ولاردى دۇرىس ورناتۋى قاجەت.
«جارىلۋ قاۋپى بار قالدىقتارمەن جۇمىستار كەزىندە ساپەرلەر قورعانىس كوستيۋمىنىڭ «سوكول» جانە «ساقتاۋ» سىندى جەڭىل ۇلگىلەرىن، سونىمەن قاتار «ساۋىت» سىندى اۋىر ۇلگىلەرىن كيەدى. وق- دارىلەردىڭ جارىلۋ قاۋپى بار قالدىقتارى جول تالعامايتىن ۇشوستىك بورتتى اۆتوموبيلدەرمەن تاسىمالدانادى. ولار جۇرگىزۋشىنى توسىن جارىلىستان قورعاي الادى»، - دەدى باقىت قۇرمانبايەۆ.
