رۋسلان دالەنوۆ داعدارىستان ەكونوميكانىڭ قاي سالالارى زارداپ شەككەنىن ايتتى

نۇر- سۇلتان. قازاقپارات - ۇلتتىق ەكونوميكا ءمينيسترى رۋسلان دالەنوۆ كوروناۆيرۋس پاندەمياسى سالدارىنان جاھاندىق داعدارىستىڭ كەلتىرگەن زالالى تۋرالى ايتىپ بەردى، دەپ حابارلايدى قازاقپارات ءتىلشىسى.

«بارلىق ەلدەر قيىندىقتارعا تاپ بولدى. ەسەپتەۋلەرگە سايكەس، قاڭتار ايىندا 160 ەل ەكونوميكالىق ءوسىمدى بولجاعان ەدى، ال ءۇش ايدان كەيىن 170 مەملەكەت اتالعان كورسەتكىش تومەندەيتىنىن جاريالادى. حالىقارالىق ساراپشىلار قازىرگى جاھاندىق داعدارىس وزگەشە ەكەنىن مويىندادى، ياعني تۇتىنۋشىلار دا، وندىرۋشىلەر دە شەكتەلىپ وتىر»، - دەدى ر. دالەنوۆ ونلاين رەجيمدە حالىق الدىندا ەسەپ بەرۋ باراسىندا.

ونىڭ سوزىنە قاراعاندا، قازاقستاندا كوبىنە قىزمەت كورسەتۋ سەكتورى زارداپ شەكتى. بۇل تۇرعىدا ساۋدا، كولىك، تۋريزم، قوعامدىق تاماقتانۋ جەلىسى، كينوتەاترلار، قوناق ۇيلەر تابىسىنان قاعىلدى. وسى ورايدا ازىق- تۇلىك وتكىزەتىن ورىندار مەن ءدارىحانالاردان باسقا ساۋدا باعىتىنىڭ قىزمەتى باياۋلادى.

«مۇنى ءساۋىر ايىنداعى ستاتيستيكادان بايقاۋعا بولادى. سوندىقتان ءدال وسى سالالارعا قوسىمشا سالىق ىنتىلاندىرۋلارى ۇسىنىلدى. جالپى، شاعىن جانە ورتا بيزنەس پەن وڭدەۋشى ءىرى بيزنەس ءۇشىن نەسيەلەۋ تەتىگى كەڭەيتىلدى. كەشەندى جوسپاردا ءتيىستى شارالار ەسكەرىلگەن. وسى ورايدا شارالاردىڭ قولايلى پاكەتى جۇزەگە اسىرىلىپ جاتىر دەپ ەسەپتەيمىن»، - دەدى مينيستر.

اۆتور: رۋسلان عابباسوۆ