سۋديا مەن پروكۋروردىڭ ساۋناداعى ۆيدەوسى. جوعارى سوت تەكسەرىس ناتيجەسىن جاريالادى
جوعارى سوت باسپا ءسوز قىزمەتىنىڭ حابارلاۋىنشا، سۋديالاردى قىزمەتىنەن بوساتۋدىڭ بىرنەشە كەزەڭى بولعان.
«بىرىنشىدەن، ناقتى وسى جاعدايدا سۋديالاردىڭ ادەپ جونىندەگى كوميسسياسى سۋديانىڭ ءىس-ارەكەتتەرىندە سۋديالىق ادەپ كودەكسىنىڭ بۇزىلعانى تۋرالى قورىتىندى جاساي وتىرىپ، تەكسەرۋ جۇرگىزەدى. كودەكس بۇزىلعانى انىقتالعان جاعدايدا، وبلىستىق سوتتىڭ بارلىق سۋدياسىنىڭ قاتىسۋىمەن جالپى وتىرىس ءوتىپ، جاسىرىن داۋىس بەرۋ ارقىلى سۋديانى تارتىپتىك جاۋاپقا تارتۋ ءۇشىن ماتەريالدى جوعارعى سوت كەڭەسى جانىنداعى سوت القاسىنا جىبەرۋ تۋرالى شەشىم قابىلدايدى»، - دەدى جوعارعى سوت باسپا ءسوز قىزمەتىنىڭ جەتەكشىسى ايدوس ءسادۋاقاس.
سۋديا القابيلەردىڭ ونى جوعارعى سوت كەڭەسىندە تارتىپتىك جاۋاپقا تارتۋ تۋرالى شەشىمىنە شاعىمدانۋعا قۇقىلى جانە تەك سودان كەيىن جوعارعى سوت كەڭەسى تۇپكىلىكتى شەشىم قابىلداۋى مۇمكىن ەكەنى حابارلاندى.
كوميسسيا الماتى وبلىسى كەربۇلاق اۋداندىق سوتىنىڭ ءتوراعاسى سۋديالىق ادەپ كودەكسىنىڭ بۇزىلعانىن راستاعان.
«الماتى وبلىسى كەربۇلاق اۋداندىق سوتىنىڭ ءتوراعاسى د. ز. سەيىتوۆتىڭ مونشا كەشەنىندە بولعانىنا بايلانىستى الماتى وبلىستىق سوتىنىڭ سۋديالىق ادەپ كوميسسياسى تەكسەرۋ جۇرگىزدى. تەكسەرۋ ماتەريالدارىن كوميسسيا قاراپ شىقتى. كوميسسيا الماتى وبلىسى كەربۇلاق اۋداندىق سوتىنىڭ ءتوراعاسى د. ز. سەيىتوۆ سۋديالىق ادەپ كودەكسىن بۇزعانىن راستادى»، - دەدى ءسادۋاقاس.
ونىڭ ايتۋىنشا، سۋديا د. ز. سەيىتوۆكە قاتىستى ماتەريال الماتى وبلىستىق سوتىنىڭ جالپى وتىرىسىندا قارالادى.
ەسكە سالايىق، مامىردا الەۋمەتتىك جەلىدە ساۋنادا تۇسىرىلگەن ۆيدەو تاراعان بولاتىن. ۆيدەو اۆتورى كىممەن دەمالىپ جاتقانىن ايتادى. ونىڭ ايتۋىنشا، روليكتە الماتى وبلىسى اۋداندىق سوتىنىڭ سۋدياسى دا بولعان.
