تارازدا تۇلەكتەر كورتەجىنە قاتىسقان ءۇش كولىكتىڭ جۇرگىزۋشىسى جازالاندى

تاراز. قازاقپارات - تارازدا تۇلەكتەر كورتەجىن ۇيىمداستىرعاندارعا قاتىستى 9 اكىمشىلىك حاتتاما تولتىرىلدى، دەپ حابارلايدى Polisia.kz.

جول پوليتسەيلەرى 1-ماۋسىمنان بەرى رەيد وتكىزىپ جاتىر. سونىڭ بارىسىندا تۇلەكتەر كورتەجىنە قاتىسقان 3 جۇرگىزۋشى جاۋاپقا تارتىلدى.

«ۆاز 21144» ماركالى كولىكتىڭ جۇرگىزۋشىسى اكىمشىلىك قۇقىق بۇزۋ كودەكسىنىڭ ءۇش بابى بويىنشا جاۋاپ بەرەدى. سول سياقتى «مەرسەدەس گەلەندۆاگەن» كولىگىنىڭ تىزگىنىن ۇستاعان قالا تۇرعىنىنا قاتىستى وسى كودەكستىڭ ءتورت بابى بويىنشا حاتتاما تولتىرىلعان.

ال «مەرسەدەس كابريولەت» كولىگىنىڭ يەسى اتالمىش كودەكستىڭ ەكى بابىن بۇزعان. جامبىل وبلىسىنىڭ دەپارتامەنتى جول قوزعالىسى ەرەجەلەرىن قاتاڭ ساقتاۋ كەرەكتىگىن ەسكە سالادى. پوليتسەيلەردىڭ ايتۋىنشا، ومىردەگى ماڭىزدى وقيعالاردى تويلاۋ زاڭ بۇزۋعا سەبەپ بولماۋى كەرەك.