اتىراۋدا كوروناۆيرۋستان ءۇشىنشى ادام قايتىس بولدى
بۇل قاۋىپتى ىندەتتەن كوز جۇمعان ءۇشىنشى ادام، دەپ حابارلايدى قازاقپارات.
وبلىس اكىمى باسپا ءسوز قىزمەتىنىڭ مالىمەتىنشە، قايتىس بولعان ناۋقاس قۇرمانعازى اۋدانىندا تۇرعان. اقكول اۋىلىنىڭ 72 جاستاعى تۇرعىنى ەكى جاقتى پنيەۆمونيامەن اۋدانداعى ورتالىق اۋرۋحانانىڭ جۇقپالى اۋرۋلار بولىمىنە جاتقىزىلعان. زەينەتكەر ايەلدە ارتەريالدى گيپەرتەنزيا، تامىردان شىققان پروگرەسسيۆتى ديسكركۋلياتورلى ەنسەوپاتيا، باۋىر ستەاتوزى، سوزىلمالى پانكرەاتيت اۋرۋلارى بولعان.
ناۋقاسقا 4-ماۋسىمدا COVID-19 ينفەكسياسىنىڭ بار-جوعىن انىقتاۋ ءۇشىن تەكسەرۋ جۇرگىزىلگەن. ال، 6-ماۋسىمدا تالداۋ قورىتىندىسى كوروناۆيرۋس ينفەكسياسىنىڭ بارىن كورسەتكەن.
«بۇدان كەيىن ناۋقاستى وبلىستىق جۇقپالى اۋرۋلار اۋرۋحاناسىنا اۋىستىرۋعا دايىنداپ ەدى. ءبىراق، ونىڭ جاعدايى كۇرت ناشارلاپ كەتتى. دارىگەرلەر جۇرەك-وكپە رەانيماتسياسىن جاسادى. الايدا، بۇل ناتيجەسىز بولدى. وكىنىشكە قاراي، ناۋقاس كوز جۇمدى»، - دەدى وبلىس اكىمىنىڭ باسپا ءسوز قىزمەتىنەن.
ەسكە سالا كەتەلىك، بۇعان دەيىن اتىراۋدا قاۋىپتى ىندەتتەن ەكى ادام قايتىس بولىپ، ونىڭ ءبىرى ۇيىندە ءبىر اپتا جاتىپ قالعانىن حابارلاپ ەدىك.
