بلوكپوستا تەمەكى تۇرىندە پارا العان اقتوبە قالاسىنىڭ پوليتسيا ينسپەكتورى ۇستالدى

نۇر- سۇلتان. قازاقپارات - اقتوبە وبلىسى بويىنشا سىبايلاس جەمقورلىققا قارسى قىزمەت اقتوبە وبلىسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ پاترۋلدىك پوليتسياسىنىڭ روتا قىزمەتىنىڭ ينسپەكتورىنا قاتىستى سوتقا دەيىنگى تەرگەۋدى جۇرگىزىپ جاتىر.

بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگىنىڭ جەدەل- تەرگەۋ قىزمەتىنىڭ ناتيجەلەرى تۋرالى وتكەن ونلاين بريفينگتە ايتىلدى، دەپ حابارلايدى قازاقپارات ءتىلشىسى.

«اتالعان تۇلعا اعىمداعى جىلدىڭ 30 - مامىرىندا اقتوبە قالاسىنىڭ شىعا بەرىسىندە ورنالاسقان «№4 ماگيسترال» بلوكپوستان ارنايى رۇقسات قاعازسىز كەدەرگىسىز ءجۇرۋ ءۇشىن جەڭىل كولىك جۇرگىزۋشىسىنەن قۇنى 10800 تەڭگە بولاتىن «پارلامەنت» تەمەكىسىنىڭ ەكى بلوگى تۇرىندە پارا العان»، - دەيدى ق ر سىبايلاس جەمقورلىققا قارسى ءىس- قيمىل اگەنتتىگى 1- دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بيعايداروۆ.

ونىڭ ايتۋىنشا، پوليتسيا ينسپەكتورىنىڭ كىنانى تولىق مويىنداۋىنا بايلانىستى تۇتقىندالعان جوق. «سوتقا دەيىنگى تەرگەۋ جالعاسۋدا. وزگە اقپارات تەرگەۋ مۇددەسى ءۇشىن جاريالانبايدى»، - دەيدى ول.

اۆتور: زارينا قاھارمان