كيىك قازاقستاننان وزبەكستانعا اۋدى

نۇر- سۇلتان. قازاقپارات - قازاقستاننىڭ بيولوگيالىق سان الۋاندىقتى قورعاۋ قاۋىمداستىعى كيىكتەردىڭ قازاقستاننان وزبەكستان اۋعانىن ءمالىم ەتتى، دەپ حابارلايدى قازاقپارات ءتىلشىسى.

«قازاقستاننىڭ بيولوگيالىق سان الۋاندىقتى قورعاۋ قاۋىمداستىعى مەن ق ر شەكارا قىزمەتى قازاقستان مەن وزبەكستان اراسىنداعى شەكارا بوگەتتەرىندەگى ارنايى وتكەلدەر ارقىلى كيىكتەردىڭ وتكەنىن دالەلدەيتىن ايعاقتاردى تاپتى. 2012 -جىلدان باستاپ قاۋىمداستىق شەكارا قىزمەتىمەن جانە ورمان شارۋاشىلىعى جانە جانۋارلار الەمى كوميتەتىمەن بىرلەسىپ، ءۇستىرت پوپۋلياتسياسى كيىكتەرىنىڭ كوشى- قونىن جەڭىلدەتۋ ءۇشىن جۇمىس جۇرگىزىپ جاتىر. 2015 -جىلى قاۋىمداستىق ۇسىنىسى نەگىزىندە شەكارا قىزمەتى ءاربىر شاقىرىم سايىن سىم تەمىردەن جاسالعان بوگەتتەردى جارتىلاي الىپ تاستادى»، - دەپ اتاپ وتەدى ۇيىم Facebook پاراقشاسىندا جاريالاعان اقپاراتىندا.

قاۋىمداستىق مالىمەتىنشە، وزبەكستاننىڭ اۋماعىنا كىرەتىن ۇستىرتتە سوڭعى 5 جىلدا العاش رەت كيىكتەر كوزگە تۇسكەن.

«ءدال وسى جاڭالىق قازاقستاننىڭ شەكارا قىزمەتىمەن بىرگە ەكى ەلدىڭ مەملەكەتتىك شەكاراسىنداعى شەكارالىق بەلدەۋدى ارالاپ كورۋگە نەگىز بولدى. ءسويتىپ بوگەت بويىندا 7 نۇكتەدەن كيىكتەردىڭ ءىزىن بايقادىق. ق ب ا ق ق بۇل باعىتتاعى جۇمىستى جالعاستىرادى. بيىل شەكارا قىزمەتىمەن بىرگە قوسىمشا شولعىنداۋ جوسپارلانىپ وتىر»، - دەپ اتاپ وتەدى قاۋىمداستىقتان.

اۆتور: مارلان جيەمباي