كوروناۆيرۋس جۇقتىرعان پروۆيزور: تىنىسىم تارىلىپ، توسەكتە دۇرىس جاتا المادىم
ول قازاقپارات تىلشىسىنە قاۋىپتى ۆيرۋسپەن قالاي كۇرەسكەنى تۋرالى ەگجەي-تەگجەيلى ايتىپ بەردى. ۆيرۋس جۇقتىرعان مانات ءالماحانوۆا 4-مامىردان بەرى ۇيدەن شىعا الماي وتىر. العاش رەت 12-ءساۋىر، ياعني جەكسەنبى كۇنى تاماعى جىبىرلاي باستاعاندا ول جاي عانا سۋىق تيگەن بولار دەپ ويلاعان. ەمحانا قىزمەتكەرى كوروناۆيرۋس جۇقتىرعانى ءۇش ۇيىقتاسا تۇسىنە كىرمەگەنىن ايتتى.
«بالا كەزىمنەن مەندە سوزىلمالى انگينا بار بولاتىن. سودان بولار ەسكى اۋىرۋ دەپ قامسىز جۇرە بەردىم. ءبىر كۇن ءوتتى. كەلەسى كۇنى دەنەم توڭىپ، قالتىراپ بىردەن قىزۋىم كوتەرىلدى. الايدا ءوزىم پروۆيزور بولعاندىقتان قولدا بار پرەپاراتتاردىڭ بارلىعىن ىشە باستادىم. ءبىراق، ءبىر بايقاعانىم قانشا ءدارى ىشسەم دە ماعان كومەكتەسپەدى. بىرنەشە كۇن وتكەن سوڭ ارقامنىڭ وكپە تۇسى اۋىرا باستادى. سول كەزدە مەندە قورقىنىش سەزىمى پايدا بولدى. اۋىرىپ تۇرسام دا اپتانىڭ دەمالىس كۇندەرىن كۇتتىم. سارسەنبى كۇنى جۇمىستا تەست تاپسىردىم. تەست ناتيجەسى كۇماندى بولدى. سول ءۇشىن ماعان پ ت ر تالداۋدان ءوتۋ ۇسىنىلدى. بەيسەنبى كۇنى پ ت ر تاپسىردىم. جۇما كۇنى جۇمىستا دىرىلدەپ قالتىراپ وتىرا الماي كەتتىم. سەنبى كۇنى مەندە دەنە قىزۋىم ءتۇسىپ، تاماعىم اۋىرعانى باسىلعانىمەن دەمىكپە، جوتەل پايدا بولدى. توسەكتە گوريزونتالدى جاتا الماي، تىنىسىم تارىلا باستادى»، - دەدى مانات.
ونىڭ ايتۋىنشا، سەنبى كۇنى تۇنگى ساعات 23:00 شاماسىندا قىزمەتتىك چاتتان «ءالماحانوۆا مانات - COVID-19 تەست وڭ ناتيجە كورسەتتى» دەگەن حابارلاما كەلدى.
«وسى حابارلامادان سوڭ مەنىڭ ۇيقىم قاشتى. بويىمدى ۇرەي، قورقىنىش بيلەدى. جەكسەنبى كۇنى تاڭەرتەڭ مەنى جەدەل جاردەم الماتى قالاسى فتيزيوپۋلمانولوگيا ورتالىعىنا الىپ كەتتى. سول جەردە دارىگەرلەر ماعان ەمدەۋ كۋرسىن بەلگىلەدى. رەنتگەنگە تۇسكەنىمدە ناتيجەسى تازا بولىپ شىقتى. ۆيرۋسقا قارسى الۋۆيا دەگەن پرەپارات ءىشتىم»، - دەدى مانات.
ۆيرۋسقا قارسى پرەپارات اۋىر بولعاندىقتان، پاتسيەنتكە كەرى اسەرى وتە كوپ بولعان. مانات بىرنەشە كۇن بويى قۇسىپ، تاماققا تابەتى ناشارلاعان. «جۇرەگىم ايني بەردى. سوسىن ەمدەۋشى دارىگەر الۋۆيا پرەپاراتىن بىرنەشە كۇنگە توقتاتتى. ەرتەسىنە ۇيقىبەزدىڭ، باۋىر جۇمىسىن تەكسەرۋ ءۇشىن تامىردان قان الدى. ءبىراز كۇندە تابەتىم قايتا جاقسارعان سوڭ ءدارىنى قايتا قوستى. وسىلاي 10 كۇن ءوتتى. 10 كۇننەن سوڭ تاعى دا جۇرەگىم اينىپ قۇسا باستادىم. ودان كەيىن دە دارىگەر كىشكەنە ءۇزىلىس بەردى. ال جاعدايىم جاقسى بولاتىن. جوتەل، ەنتىگۋ 10 كۇندە كەتكەن بولاتىن. ءبىراق، دارىلەردىڭ كۇشى ىشكى ورگاندارىما اسەر ەتە باستادى»، - دەدى ول.
ول اۋرۋحانانىڭ ماماندارىنىڭ بىلىكتىلىگى مەن ەمحاناداعى قىزمەتكە كوڭىلى تولاتىندىعىن جاسىرمادى.
«تاماقتارى وتە ءدامدى بولدى. كۇندەلىكتى ءارتۇرلى جەمىس-جيدەك، پىسىلگەن ىستىق ءبالىش، بۇقتىرمالار، سالات بەرەتىن. كوپ ادام اس-اۋقاتقا قاتىستى نارازىلىق ءبىلدىردى عوي. ءبىراق مەن جاتقان اۋرۋحانادا 5 ۋاقىت قۇنارلى تاماق بەرىپ تۇردى. بەرگەن تاماقتارى 10 كۇندە قايتالانبادى دەسەم دە ارتىق ەمەس. مەديتسينا قىزمەتكەرلەرى ءبىزدىڭ كوڭىل-كۇيىمىزدى كوتەرىپ، ءاردايىم پوزيتيۆ سىيلايتىن. دالىزدە 24 ساعات شاي قايناپ، ۇستەل ۇستىندە شاي، قانت، تۇز تۇرادى. مينەرالدى سۋ تاراتادى»، - دەدى ول. اۋرۋحاناعا تۇسكەنىنە 15 كۇن بولعاندا مانات ءالماحانوۆا قورىتىندى پ ت ر تالداۋىن تاپسىرعان.
«ول كۇنى قوبالجىپ، قورقىپ كۇتتىم. 4-مامىردا پ ت ر تالداۋى الىندى. ناتيجەسىن كۇتكەندە دە ساعاتتار جىلعا اينالعانداي بولدى. تالداۋ ناتيجەسى ءالى ۆيرۋس بار ەكەنىن كورسەتكەندە قاتتى كۇيزەلىسكە ءتۇستىم. ودان كەيىن 7-مامىردا تاپسىرعاندا تاعى دا تەست ناتيجەسى قۋانتپادى. مەن ءوزىم وسى ۆيرۋستان ءومىرى قۇتىلا المايتىنداي كۇي كەشتىم. قورقىنىش، ۇرەي بيلەدى. سەنبى كۇنى ەستىگەننەن باستاپ مەندە ءبىر اپتا ۇيقى بولعان جوق. پسيحولوگيالىق تۇرعىدان وتە اۋىر بولدى. 15-مامىردا تاعى قورىتىندى پ ت ر تاپسىردىم. سول كەزدە تەست ناتيجەسى تەرىس بولىپ شىقتى. ەكى رەت قاتار تەرىس ناتيجە شىققان سوڭ 16-مامىردا مەنى اۋرۋحانادان شىعاردى»، - دەدى مانات.
پاتسيەنت ءالى دە ۇيىندە 14 كۇندىك كارانتيندە جاتىر. قازىر ول تاعى دا پ ت ر تالداۋىن كۇتىپ وتىر. تەرىس شىقسا، جۇمىسىنا ورالماقشى. مانات ءوزىنىڭ كوروناۆيرۋستى ناقتى قايدا جۇقتىرعانىن بىلمەيدى. ءوزى قىزمەت ەتەتىن №12-قالالىق ەمحانادا ودان بۇرىن كوروناۆيرۋس دەگەن دياگنوزبەن 7 ادامدى جەدەل جاردەممەن الىپ كەتكەن.
«اۋرۋحانادا جاتقاندا كوپشىلىكتىڭ ءبىر-اق سۇراعى بولدى. شىنىمەن ۆيرۋس بار ما ەكەن دەگەن. ءيا، ۆيرۋس بار ەكەن. بولعاندا دا جاي عانا تۇماۋ ەمەس، وتە اۋىر بولادى ەكەن. بايقاساڭىز مەن اۋرۋحاناعا تۇسكەندە كوكتەم بولعان. قازىر دالادا جاز. ال مەن ءالى ۇيدە قامالىپ وتىرمىن. ۇكىمەت بەرەتىن اقشا ءۇشىن اۋىرىپ جاتىر دەگەن قاۋەسەت تە بار. ءبىراق مەن ايتار ەدىم، باسىمنان وتكەن قيىن احۋالدى قانشا اقشا بەرسە دە قايتالاماۋعا بار كۇشىمدى سالار ەدىم»، - دەدى ول. مانات جالعىز ءوزى تۇرادى. سوندىقتان دا ونىڭ تۋىستارى، جاقىندارىندا ۆيرۋس جۇقتىرۋ قاۋپى بولماعان.
