ناۋبەت جىلدارى قازاق حالقىنىڭ جارتىسىنا جۋىعى قازا تاپقانىن دالەلدەيتىن عىلىمي ەڭبەك جوق - دەپۋتات

نۇر-سۇلتان. قازاقپارات - قازاق حالقىنا ءتان اشارشىلىقتىڭ ءوز دەڭگەيىندە زەرتتەلمەي جاتىر.

بۇل تۋرالى بۇگىن ەلوردادا وتكەن «قازاقستان: تاريحي تاعىلىم ساياساتى» حالىقارالىق online-كونفەرەنسياسىندا ايتىلدى، دەپ حابارلايدى قازاقپارات ءتىلشىسى.

«ساياسي قۋعىن- سۇرگىن قۇرباندارىن ەسكە الۋ 1997 -جىلدان بەرى ءبىزدىڭ مەملەكەتىمىزدە كەشەندى تۇردە جۇزەگە اسىرىلىپ كەلە جاتىر. بۇگىنگى حالىقارالىق كونفەرەنسياعا تەك قانا قازاقستان عالىمدارى عانا ەمەس، ت م د ەلدەرىنىڭ جانە باسقا دا شەتەل عالىمدارى قاتىسۋدا. ءبىز ءارقاشان تاريحتان ساباق الۋىمىز كەرەك. تاريحىمىزدىڭ جاقسى جاقتارىن عانا ەمەس، كولەڭكەلى جاقتارىن دا زەردەلەي بىلسەك - ۇلكەن ماقساتتارعا جەتەتىن جولدى اشامىز»، - دەيدى ق ر پارلامەنت ءماجىلىسىنىڭ دەپۋتاتى نۇرلان دۋلاتبەكوۆ.

ونىڭ ايتۋىنشا، مۇنداي كونفەرەنتسيا سەمەي، شىمكەنت، ماڭعىستاۋ، قاراعاندىدا وتكەن. بۇگىنگى كونفەرەنسيا سونىڭ قورىتىندىسى دەۋگە بولادى.

«ساياسي رەپرەسسيا وسى ۋاقىتقا دەيىن زەرتتەلىپ كەلدى، ءبىراق قازاق حالقىنا ءتان اشارشىلىقتىڭ ءوز دەڭگەيىندە زەرتتەلمەي جاتقانى مەنى تولعاندىرادى. سول ناۋبەتتەن قازاق حالقىنىڭ جارتىسىنا جۋىعى قازا تابۋى ءبارىمىزدىڭ قابىرعامىزدى قايىستىرىپ، جۇرەگىمىزدى اۋىرتادى. وسىنى دالەلدەپ، باعا بەرەتىن عىلىمي ەڭبەك، مونوگرافيا جازدىق پا؟ وسى باعىتتا كوپ جۇمىس ىستەۋىمىز كەرەك. قازىرگى پاندەميا جاعدايىنا قاراماستان وسى تاقىرىپتى تاعى ءبىر ەلەپ-ەكشەپ، كورسەتۋىمىز دۇرىس بولدى دەپ ويلايمىن»، - دەيدى ول.

اۆتور: زارينا قاھارمان