العىس ايتار ەدىم - سەمەيدە تۋىپ، ا ق ش- تا تۇراتىن قىز بيولوگيالىق اتا- اناسىن ىزدەيدى

نۇر- سۇلتان. قازاقپارات - امەريكالىق وتباسى اسىراپ العان ەتنيكالىق قازاق قىزى ەيجا بەرگەر ءوزىنىڭ بيولوگيالىق اتا- اناسىن ىزدەيدى. بۇل جايىندا سەمەيدە دۇنيەگە كەلگەن بويجەتكەن الەۋمەتتىك جەلىدە جازدى، دەپ حابارلايدى قازاقپارات.

«مەنىڭ اتىم - ەيجا. بۇل اسىراپ العان اتا- انام بەرگەن ەسىم. باستاپقىداعى اتى- ءجونىم سالتانات اشقىنوۆا بولعان. مەنى سەمەي قالاسىنان 2011 -جىلى 16 ايلىق كەزىمدە اسىراپ العان. ءوزىمنىڭ بيولوگيالىق اتا- انامدى تابۋعا شەشىم قابىلدادىم. اتا- انامدى تابۋعا دەگەن نيەت بارلىق ۋاقىتتا دا بولعان ەدى»، - دەدى بويجەتكەن Facebook پاراقشاسىندا جۋرناليست تالعات المانوۆقا بەرگەن سۇحباتىندا.

ەيجا بيولوگيالىق اتا- اناسىن ىزدەيتىندىگىن Facebook-تەگى Kazakh American Association (قازاقستاندىق- امەريكالىق قاۋىمداستىق) پابليگىندە جازعان- دى.

«مەنىڭ تەگىم - بەرگەر (Berger) ، فلوريدادا تۇرامىن. ەكى اپكەم بار، وتباسىداعى ورتانشى بالامىن، جاسىم 20 دا. كوللەدجدە ءبىلىم الىپ جاتىرمىن. وتباسىمىز وتە تاتۋ، ءبىز ۋاقىتتى بىرگە وتكىزگەندى جاقسى كورەمىز»، - دەپ اتاپ وتەدى ول. ونىڭ ايتۋىنشا، بارلىق ۋاقىتتا دا ءوزىن اسىراپ العاندىعىن بىلگەن. مۇنى امەريكالىق اتا- اناسى دا جاسىرماعان.

«اتا- انام اسىراپ الۋ پروتسەسى جايىندا ايتقان بولاتىن. ءبىراق، كوپ ءمان- جايدى ەگجەي- تەگجەيلى بىلمەيمىن. ەڭ باستىسى پروتسەستىڭ وتە كوپ كەزەڭنەن تۇرعاندىعىن ايتقان. باستاپقىدا مەن ولاردىڭ جوسپارىندا بولماعان ەكەنمىن. اتا- انام كىشكەنتاي ۇل بالا اسىراپ الۋعا نيەتتەنگەن. وسىلايشا، مەن توسىن تاڭداۋ بولىپپىن»، - دەدى ەيجا. سونىمەن قاتار ول تۋعان اتا- اناسىن ىزدەۋگە نەلىكتەن شەشىم قابىلداعاندىعىن دا ايتىپ بەردى.

«بارلىق ۋاقىتتا قولىم بوس بولعان ەمەس. جاقسى كورەتىن وتباسىم، جايلى ءومىرىم بار. ءبىراق، ەسەيىپ، تاۋەلسىز بولا تۇسكەنىمدى تۇسىنەمىن. شەشىمىمدى اپكەلەرىم دە قولداپ وتىر. بيولوگيالىق اتا- اناما ەشقانداي جات سەزىمىم، وكپە- رەنىشىم جوق. ەش ۋاقىتتا كىنا تاقپايمىن دا»، - دەدى ەيجا.

قازىرگى ۋاقىتتا ونەر مەكتەبىندە ءبىلىم الىپ، ءسان ينۋسترياسىنداعى مەنەدجمەنت پەن ماركەتينگتىڭ قىر- سىرىن مەڭگەرىپ جۇرگەن ەيجا تۋعان اناسىمەن كەزدەسكەن ساتتە نە ايتۋى مۇمكىن ەكەندىگىمەن دە ءبولىستى.

«اناما نە ايتارىمدى ازىرشە بىلمەيمىز. ەگەر، بىردەڭە ايتار مۇمكىندىگىم تۋاتىن بولسا، وندا العىسىمدى بىلدىرەتىن ەدىم. ول مەنى، ءوزىنىڭ تۋعان بالاسىن بىرەۋگە بەرۋگە ءماجبۇر بولعانىنا وكىنەمىن. قۇجاتتارعا سايكەس مەن بيولوگيالىق انامنىڭ ەكىنشى بالاسى ەكەنمىن. وعان راحمەتىمدى ايتارمىن. سەبەبى، قازىرگى ءومىرىم تاماشا»، - دەدى ول. سۇحبات بارىسىندا ەيجاعا تۋعان اناسىنىڭ ەسىمى - قۇرالاي اشقىنوۆ، ال اكەسىنىڭ اتى قۋات اشقىنوۆ ەكەندىگى ايتىلدى.