ليۆانداعى قازاق بىتىمگەرى: ءبىز ەشكىمگە كۇش كورسەتىپ، قارۋ قولدانبايمىز

نۇر- سۇلتان. قازاقپارات - بۇگىن – ب ۇ ۇ باس اسسامبلەياسى بەكىتكەن حالىقارالىق بىتىمگەرلەر كۇنى. ال ءبىتىستىرۋ، بىتىمگە كەلتىرۋ، تاتۋلاستىرۋ قازاقتىڭ قانىندا بار، ادەپتىك داستۇرىندە ءسىڭىستى بولعان قۇقىقتىق ۇستانىمدارىنىڭ ءبىرى ەكەندىگى داۋسىز.

وعان بۇگىندە تاياۋ شىعىستا ورنالاسقان ليۆان رەسپۋبليكاسىنداعى بۇۇ بىتىمگەرشىلىك ميسسياسىنىڭ ءۇندىستان باتالونى قۇرامىندا قىزمەت اتقارىپ جۇرگەن 3- قازاقستاندىق بىتىمگەرشىلىك روتاسىن اتاساق دا بولادى. وسىناۋ اتاۋلى داتاعا وراي جىراقتا جۇرگەن بىتىمگەرىمىز اسقار ىبىرايىممەن WhatsApp مەسسەندجەرى ارقىلى تىلدەسكەن ەدىك.

- اسقار داۋلەت ۇلى، ەلدەن جىراقتا قاۋىپتى ايماقتا ءجۇرسىز. قيىنشىلىققا تولى ءارى جاۋاپتى قىزمەتىڭىزدىڭ قىر- سىرىمەن بولىسسەڭىز.

- ءيا، 6 ايدان بەرى ليۆان مەملەكەتىندە بىتىمگەرشىلىك قىزمەتىن اتقارىپ جاتىرمىز. بىتىمگەرشىلىك روتاسىنىڭ ەڭ ءبىرىنشى ماقساتى - بەيبىتشىلىكتى ساقتاۋ جانە قالپىنا كەلتىرۋ. ءبىزدىڭ نەگىزگى قىزمەتىمىزدىڭ ءبىرى - پاترۋلدەۋ. پاترۋلدەۋدىڭ ەكى ءتۇرى بار. ءبىرىنشىسى - جاياۋ جانە كولىكپەن شولعىنداۋ. بۇل كوپشىلىك اراسىندا بەلگىلى ءبىر ايماقتا جۇرگىزىلەدى. باقىلاۋىمىزعا الىنعان ايماقتىڭ تىنىس- تىرشىلىگىن ءجىتى باقىلاۋعا الۋعا تىرىسامىز. كۇدىكتى جايت تۋىنداعاندا جەدەل شارا قابىلداپ، جوعارى باسشىلىققا بايانداپ وتىرامىز.

ەكىنشىسى - بلوكپوستاردا قىزمەت اتقارۋ جانە ءوزىمىز تۇرىپ جاتقان بازانىڭ قاۋىپسىزدىگىن كۇزەتۋ. بۇل كەزدە كولىكتەردىڭ ءارلى- بەرلى ءجۇرىسىن ءجىتى باقىلاپ، كۇدىكتى ءجايت ورىن الار بولسا، شۇعىل ارەكەت ەتۋگە تىرىسامىز. قىزمەتتەن قولىمىز بوساعان ۋاقىتتا دەنە دايىندىعىنا مەيلىنشە ءمان بەرىپ، سپورت ويىندارىمەن كوبىرەك شۇعىلدانامىز. دەسانتتىق شابۋىلداۋشى اسكەريلەردىڭ دەنە دايىندىعى وتە جوعارى دەڭگەيدە بولۋى ءتيىس. سول سەبەپتى قولىمىز قالت ەتكەندە سپورت شارالارىمەن اينالىسىپ، ءتىل ۇيرەنۋگە دە دەن قويامىز. جوعارىدا ايتقانىمداي، ليۆانداعى نەگىزگى مىندەتىمىز، ياعني وپەراتسيامىز - بەيبىتشىلىكتى ساقتاۋ. ءبىز ەشكىمگە كۇش كورسەتىپ، قارۋ قولدانبايمىز. تەك ءوزىمىزدى قورعاۋ جولىنداعى سوڭعى شارا رەتىندە عانا قارۋدى قولىمىزعا الامىز. بىتىمگەرشىلىك ميسسياسىنىڭ ەڭ قيىن ءارى جاۋاپكەرشىلىگى مول تۇسى دا وسى. سەبەبى، قانداي قيىن ءارى كۇردەلى جاعداي بولسا دا، بىتىمگەرشىلەر ءبىرىنشى بولىپ قارۋ قولدانا المايدى. سەبەبى - ونىڭ ماقساتى بەيبىتشىلىككە شاقىرۋ جانە ساقتاۋ.

ليۆان ەلىندەگى ماڭىزدى ماسەلەلەردىڭ ءبىرى - جەرگىلىكتى تۇرعىندارمەن بىتىمگەرلەر اراسىنداعى قارىم- قاتىناستى جاقسارتۋ. بىزگە دەيىن بولعان بىتىمگەرشىلىك روتالارى جەرگىلىكتى تۇرعىندارمەن جىلى بايلانىس ورناتقان ەكەن، ءبىز دە سول جولمەن ءجۇرىپ كەلەمىز. سونىڭ ارقاسىندا جەرگىلىكتى تۇرعىنداردىڭ قازاق ەلىنە دەگەن ەرەكشە كوزقاراسىن قالىپاستىرىپ ۇلگەردىك دەپ تە ايتا الامىن. جەرگىلىكتى تۇرعىندار كەزدەسكەن ساتتە قازاقستاندىق بىتىمگەرلەرگە ريزاشىلىعىن، سىي- قۇرمەتىن ءبىلدىرىپ جاتادى.

- حالىقارالىق دەڭگەيدەگى قىزمەت جاۋاكەرشىلىكتى، ءبىلىمدى قاجەت ەتەدى. جەرگىلىكتى حالىقپەن بايلانىس ورناتۋ ءۇشىن ءتىلدى ەركىن مەڭگەرۋ دە قاجەت. وسى تاقىرىپتا اڭگىمە وربىتسەڭىز.

- شىنىمەن دە، بۇل ميسسيا وتە بىلىمدىلىكتى ءارى تاپقىرلىقتى قاجەت ەتەدى. ليۆانعا كەلەر الدىندا قازاقستاننىڭ بىتىمگەرلەر پولكىندە اعىلشىن ءتىلىن جەتە بىلۋگە تىرىستىق. ارينە، بۇل جەرگە كەلگەندە جەتىك بىلمەسەك تە، وزگە مەملەكەتتەردەن كەلگەن ارىپتەستەرىمىزبەن، اعىلشىن ءتىلىن بىلەتىن جەرگىلىكتى تۇرعىندارمەن قارىم- قاتىناس جاسايتىنداي دەڭگەيدە اعىلشىن ءتىلىن مەڭگەرگەنبىز. قالاعانىمىزدى ءتۇسىندىرىپ، ءوزىمىز دە ولاردى ەمىن- ەركىن تۇسىنە الامىز. قازىرگى ۋاقىتتا قازاقستاندىق بىتىمگەرلەر ءۇندىستاننىڭ بىتىمگەر باتالونىنىڭ قۇرامىندا جۇرگەنىن وزدەرىڭىز دە جاقسى بىلەسىزدەر. ياعني، ءبىز ۇندىلىك اسكەري قىزمەتشىلەرمەن كۇندەلىكتى قارىم- قاتىناستامىز. ءيا، ءبىر- بىرىمىزبەن قارىم- قاتىناسىمىز اعىلشىن تىلىندە ءوتىپ جاتىر. ءبىراق، ولاردىڭ انا تىلدەرى حيندي ءتىلى بولعاندىقتان، سونى دا ازداپ ۇيرەنىپ ۇلگەردىك دەپ ايتا الامىن.

- بيىل ەرەكشە پاندەميا جاعدايىندا بىتىمگەرلەرىمىزدىڭ جۇمىسى دا قيىن كەزەڭگە تاپ كەلىپ وتىر. وسى ورايدا سىزدەردىڭ جۇمىستارىڭىز قالاي جۇرۋدە؟ كەدەرگىلەر بار ما؟

- الەم ەلدەرىنىڭ بارلىعىن شارپىعان كوروناۆيرۋس ىندەتى ليۆانعا دا جەتتى، اينالىپ وتكەن جوق. ەل اۋماعىندا بارلىق جەر كارانتينگە جابىلىپ، ەپيدەمياعا قارسى ءىس- شارالار تولىقتاي جۇرگىزىلدى دەپ ايتا الامىن. ءبىراق، بۇل شارالار ءبىزدىڭ قىزمەتىمىزگە ەشقانداي كەدەرگى كەلتىرە المادى. ءبىز ساقتىق شارالارىن بارىنشا قابىلداي وتىرىپ، موينىمىزعا جۇكتەلگەن تاريحي مىندەتىمىزدى تولىقتاي جۇزەگە اسىرىپ جاتىرمىز. بىتىمگەرلەرگە ۆيرۋستى جۇقتىرۋ فاكتىلەرى تىركەلگەن اۋداندارعا ساپار جاساماۋ جانە جەرگىلىكتى حالىقپەن بايلانىستى بارىنشا شەكتەۋ ۇسىنىلعان. جەكە قۇراممەن كوروناۆيرۋس ينفەكتسياسىن جۇقتىرۋدىڭ الدىن الۋ جانە بولدىرماۋ بويىنشا ساباق ۇنەمى وتكىزىلىپ تۇرادى.

- ءوزىڭىز جايلى مالىمەت بەرە كەتسەڭىز. قاي جەردە تۋدىڭىز، قانداي وقۋ ورنىن ءبىتىردىڭىز، اسكەري قىزمەتتە قانشا جىل ەڭبەك ەتىپ جاتىرسىز؟

- الماتى وبلىسىنىڭ جامبىل اۋدانىنا قاراستى بەرتاس اۋىلىندا قاراپايىم قازاق وتباسىندا 1995 -جىلى 1 -مامىردا دۇنيەگە كەلگەنمىن. كەيىن اتا- انام وسى ءوڭىردىڭ ءشيلىباستاۋ اۋىلىنا قونىس اۋدارىپ، سول جەردە ورتا مەكتەپتى ءبىتىردىم. سودان سوڭ قورداي اۋىل شارۋاشىلىعى كوللەدجىندە مال دارىگەرى ماماندىعى بويىنشا ءبىلىم الدىم. ال وتان الدىنداعى اسكەري بورىشىمدى اقتوبە قالاسىنداعى 6655 -اسكەري بولىمىندە وتكەردىم. 2016 -جىلى جوعارى ءبىلىم ديپلومىن العاننان كەيىن قاپشاعاي قالاسىنداعى قازاقستان بىتىمگەرلىك پولكىنە قابىلداندىم. سول ۋاقىتتان بەرى وتان الدىنداعى بورىشىمدى ابىرويمەن اتقارىپ كەلەمىن. قازاقستان رەسپۋبليكاسىنىڭ جانە قازاق حالقىنىڭ اتىنان وسىناۋ ەلىمىز ءۇشىن زور مارتەبە سانالاتىن ميسسيانى اتقارۋ مەن ءۇشىن ۇلكەن ابىروي دەپ سانايمىن!

- اسقار، حالىقارالىق كاسىبي مەرەكەمەن شىن جۇرەكتەن قۇتتىقتايمىز! جاۋاپتى قىزمەتىڭىزدى ابىرويمەن اتقارۋعا جازسىن!

اۆتور: مارلان جيەمباي