نۇر- سۇلتان اكىمدىگىنىڭ شتاتى دا، بيۋدجەتى دە قىسقارتىلادى
«مەملەكەت باسشىسىنىڭ تاپسىرماسىنا سايكەس، كۆازيمەملەكەتتىك سەكتوردا، سونىمەن قاتار اپپاراتتىڭ ىشىندە دە شتاتتىق قۇرىلىم مەن بيۋدجەتتى وڭتايلاندىرۋ جۇرگىزىلىپ جاتىر. 17 زاڭدى تۇلعا وڭتايلاندىرىلدى. سونىمەن قاتار بيۋدجەت قايتا قارالىپ، ءونىمسىز شىعىستار 27 ميلليارد تەڭگەگە قىسقارتىلدى. قازىرگى ۋاقىتتا تاعى 7 ميلليارد تەڭگەنى قىسقارتۋ باعىتىندا جۇمىس جۇرگىزىپ جاتىرمىز»، - دەدى ەلوردا اكىمى.
ونىڭ اتاپ وتۋىنشە، جالپى وڭتايلاندىرىلاتىن قاراجات سوماسى 35 ميلليارد تەڭگەنى قۇرايدى. «بۇل قاراجات الدىمىزدا تۇرعان الەۋمەتتىك ماڭىزى بار ينفراقۇرىلىمدىق مىندەتتەردى شەشۋگە جۇمسالاتىن بولادى. 14 ميلليارد تەڭگەدەن استام قاراجات ينجەنەرلىك ينفراقۇرىلىمعا، 3,5 ميلليارد تەڭگە ءبىلىم بەرۋ جۇيەسىن قولداۋعا، دەنساۋلىق ساقتاۋ مەن الەۋمەتتىك جۇمىستارعا، سونىمەن قاتار 3 ميلليارد تەڭگەدەن استام قاراجات شاعىن جانە ورتا بيزنەستى قولداۋعا، ازىق- تۇلىك قاۋىپسىزدىگىن سۋبسيديالاۋعا باعىتتالادى»، - دەدى التاي كولگىنوۆ.
اۆتور: مارلان جيەمباي
