مينيستر اياگوزدەگى كەلەڭسىز وقيعاعا قاتىستى: ءتيىستى شارا قابىلدانادى

نۇر-سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ قازاقستانداعى ارنايى الەۋمەتتىك ورتالىق پەن بالالار ءۇيىنىڭ ءبارى كەشەندى تەكسەرىستەن وتەتىنىن ءمالىم ەتتى، دەپ حابارلايدى قازاقپارات ءتىلشىسى.

«بالالاردىڭ قۇقىعىن قورعاۋ بويىنشا رەسپۋبليكالىق كوميسسيا وتىرىسىندا ءبىراز ماسەلە ايتىلدى. ناقتى اياگوزدە بولعان ماسەلەگە قاتىستى ماسەلەلەردى كوتەردىك. ءبىراق سوعان قاراماستان ءبىزدىڭ اقپاراتىمىزعا سايكەس، ءبىراز وڭىردە ءارتۇرلى كەلەڭسىز جاعداي ءالى دە جالعاسۋدا. مۇندايعا ەندى تاعى جول بەرمەۋ كەرەك. وڭىرلەردەگى بالالاردىڭ قۇقىقتارىن قورعاۋ بويىنشا كوميسسيالاردىڭ جۇمىسىنىڭ تيىمدىلىگى وتە تومەن. بۇل ماسەلەگە كوڭىل اۋدارۋ كەرەك. كوميسسيا وتىرىسىندا قابىلدانعان شەشىمگە سايكەس رەسپۋبليكاداعى بالالار ۇيىنە، الەۋمەتتىك ورتالىقتارعا، باسقا دا ۇيىمدارعا ۇلكەن كەشەندى تەكسەرىس وتكىزەتىن بولامىز. سونىڭ ناتيجەسىندە ءتيىستى شارا قابىلدانادى»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ اپپاراتتىق وتىرىسىندا.

ەستەرىڭىزگە سالا كەتسەك، وسىعان دەيىن اياگوزدەگى الەۋمەتتىك كومەك ورتالىعىندا 4 بالانىڭ قايتىس بولعاندىعى حابارلاندى. ق ر ىشكى ىستەر مينيسترلىگى ءىستىڭ تەرگەلۋىن ءوز باقىلاۋىنا الدى. وسى وقيعادان كەيىن ق ر ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدىڭ ءار وڭىرىندە ورنالاسقان مەديتسينالىق-الەۋمەتتىك كومەك كورسەتەتىن 113 مەكەمەگە تەكسەرۋ جۇرگىزىلەتىنىن ءمالىم ەتتى.

ونىڭ ىشىندە اياگوزدەگى بالالارعا ارنالعان ارنايى الەۋمەتتىك كومەك ورتالىعى بار. ال ۆەدومستۆوارالىق كوميسسيا وتىرىسىندا قازاقستانداعى ادام قۇقىقتارى جونىندەگى ۋاكىل ەلۆيرا ءازىموۆا ارنايى الەۋمەتتىك كومەك ورتالىعىندا كوپتەگەن كەمشىلىكتى اتاعان ەدى.