كوكجايلاۋدا كوڭىل كوتەرگەندەر جازاعا تارتىلادى - ەرلان قوجاعاپانوۆ

الماتى. قازاقپارات - الماتىدا كوكجايلاۋ شاتقالىندا جاپپاي دەمالىسقا شىققان ازاماتتار جازاعا تارتىلادى. بۇل تۋرالى ونلاين بريفينگ بارىسىندا قالا اكىمىنىڭ ءبىرىنشى ورىنباسارى ەرلان قوجاعاپانوۆ ايتتى، دەپ حابارلايدى قازاقپارات ءتىلشىسى.

«الماتى تەرريتورياسىندا كوپ ادامنىڭ جينالۋىنا، ماسكاسىز جۇرۋگە تىيىم سالىنعان. بۇل ادامدار وسى تالاپتاردى بۇزعان. كونسەرت قويعان، قوقىس توككەن. ولار ەشقانداي ۇيىمنىڭ سانكتسياسىن الماعان. سانيتارلىق تالاپتاردى ورىنداماعان. قازىر پوليتسيا دەپارتامەنتىنە ناقتى تاپسىرما بەردىك. بۇل ازاماتتاردىڭ ۇستىنەن اكىمشىلىك ءىس، قىلمىستىق احۋال بايقالسا ءتىپتى قىلمىستىق ءىس قوزعايمىز»، - دەدى ەرلان قوجاعاپانوۆ.

ايتا كەتۋ كەرەك، الەۋمەتتىك جەلىدە كوكجايلاۋ شاتقالىندا ساۋىق كەشىن وتكىزگەندەر تۋرالى ۆيدەو تاراعان بولاتىن.

اۆتور: گۇلميرا عوسمانالي