قاراشىعاناق كەنىشىندە كارانتين جاريالاندى
ب ق و باس مەملەكەتتىك سانيتار دارىگەرىنىڭ 23 - مامىرداعى قاۋلىسىنا سايكەس «قاراشىعاناق پەتروليۋم وپەرەيتينگ ب. ۆ. « كومپانياسى اۋماعىندا 5 -ماۋسىمعا دەيىن كارانتين رەجيمى ەنگىزىلدى. كەنىش اۋماعىندا جۇمىس ىستەيتىن قىزمەتكەرلەر مەن وندىرىستىك قىزمەتكە تارتىلعان، ازىق- تۇلىك تاۋارلارى، ءدارى- دارمەك، جانار- جاعار ماي جانە باسقا قاجەتتى ماتەريالداردى تاسىمالدايتىن كولىك قۇرالدارىن قوسپاعاندا، كولىك قۇرالدارىنىڭ كىرىپ- شىعۋىنا تىيىم سالىندى. بارلىق كولىك قۇرالدارىندا ىلەسپە قۇجاتتارى بولۋى، سانيتارلىق وڭدەۋدەن ءوتىپ، تىركەلۋى ءتيىس. تۇنگى اۋىسىمدا جۇمىس ىستەيتىندەردى، ولاردى تاسىمالدايتىنداردى، اكىمدىك، قۇقىق قورعاۋ ورگاندارى، جەدەل جاردەم، سانيتارلىق- ەپيدەميولوگيالىق، ءورت ءسوندىرۋ، اپاتتىق جانە باسقا ومىرلىك قامتاماسىز ەتۋ نىساندارى قىزمەتكەرلەرىن قوسپاعاندا، ادامداردىڭ ۆاحتالىق قالاشىقتاردىڭ ىشىندە، ولاردىڭ اراسىندا كەشكى ساعات 19.00 دەن تاڭعى 07.00 گە دەيىن ءجۇرىپ- تۇرۋىنا تىيىم سالىندى. كەنىشكە جاڭادان كەلەتىن ەڭبەك ميگرانتتارى وقشاۋلانۋ تالاپتارىن ساقتاي وتىرىپ، وزگە قىزمەتكەرلەردەن بولەك ورنالاساتىن بولادى. ءبورلى اۋدانى اكىمدىگى پروۆيزورلىق جانە كارانتيندىك ستاتسيونارلار قىزمەتىن، وعان جاتقىزىلاتىن ادامداردى تاسىمالداۋدى قامتاماسىز ەتىپ، بارلىق ۆاحتالىق قالاشىقتا تۇسىنىك جۇمىستارىن جۇرگىزەدى، شەكتەۋ شارالارىن بۇزۋشىلىق ورىن العان جاعدايدا ءوز قۇزىرەتى شەگىندە شارا الادى. سونداي- اق كەنىش اۋماعىندا سانيتارلىق- دەزينفەكتسيالىق جۇمىستار جۇرگىزىلىپ، بارلىق تازالىق جانە ساقتىق شارالارى قولعا الىنادى. ەسكە سالا كەتەيىك، بۇدان بۇرىن ورال قالاسىندا بالاباقشالاردىڭ قىزمەتى قايتا توقتاتىلعانىن، ءۇش ادامنىڭ جانساقتاۋ بولىمىندە جاتقانىن جازعان بولاتىنبىز.
