08:37, 25 - مامىر 2020 | GMT +5
الماتىداعى بلوكپوستا كولىك اپاتى بولىپ، پوليتسەي كوز جۇمدى
الماتى. قازاقپارات - الماتىدا ماس جۇرگىزۋشى بلوكپوستى سوعىپ ءوتىپ، سالدارىنان پوليتسيا قىزمەتكەرى كوز جۇمدى، دەپ حابارلايدى قازاقپارات ءتىلشىسى.
«ساعات 05:26 دا الماتى وبلىسى قاراساي اۋدانى كوكساي شاعىن اۋدانىندا «BMW» ماركالى اۆتوكولىگىنىڭ جۇرگىزۋشىسى، 1992 -جىلى تۋعان ا. ەسىمدى ازامات قوجابەكوۆ كوشەسىمەن ءجۇرىپ، جاڭا عاسىر كوشەسى قيىلىسىنداعى №4 بلوكپوستى بۇزىپ وتكەن. ول الدىمەن بەتون قورشاۋعا سوعىلىپ، سودان كەيىن ينەرتسيامەن ىشىندە ەكى پوليتسيا قىزمەتكەرى وتىرعان پاترۋل كولىگىنە سوقتىعىسقان»، - دەپ حابارلايدى پوليتسيا دەپارتامەنتى.
وكىنىشكە وراي، پاترۋلدەردىڭ ءبىرى، پوليتسيا اعا لەيتەنانتى جالعاس جانعازيەۆ، العان اۋىر جاراقاتىنان جەدەل جاردەم كولىگى كەلگەنگە دەيىن كوز جۇمدى. ونىڭ ارىپتەسى، پوليتسيا سەرجانتى داستان ءابدىقانوۆتىڭ جاعدايى اۋىر، قالاداعى جاقىن ماڭداعى اۋرۋحاناعا جەتكىزىلدى. جۇرگىزۋشى قاماۋعا الىندى. سوتقا دەيىنگى تەرگەۋ باستالدى.
