07:22, 25 - مامىر 2020 | GMT +5
اقتوبەدە كارانتين رەجيمىن جەڭىلدەتۋ تاعى كەيىنگە شەگەرىلدى
اقتوبە. قازاقپارات - اقتوبەدە وسىمەن ەكىنشى اپتا كارانتين رەجيمىن جەڭىلدەتۋ كەيىنگە شەگەرىلدى، دەپ حابارلايدى قازاقپارات ءتىلشىسى.
اقتوبە وبلىسىندا سوڭعى تاۋلىكتە تاعى 18 ادام ىندەتكە شالدىققان بولاتىن. وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆا جەرگىلىكتى ارنادا وتكەن تىكەلەي ەفير كەزىندە 25-مامىر كۇنى كارانتين رەجيمى جەڭىلدەمەيتىنىن حابارلادى.
«اقتوبە قالاسىندا اۋرۋ ءورشىپ تۇر. قازىر ءوسىم 7 پايىزدان جوعارى. بۇعان دەيىن كەيبىر نىساندى 25 - مامىردان باستاپ اشۋدى جوسپارلاساق، كورسەتكىشكە قاراپ كەيىنگە شەگەرۋگە تۋرا كەلدى. كەلەسى اپتادا تاعى دا باقىلايمىز. قالا تۇرعىندارىنا ايتارىمىز، ۇيدەن سەبەپسىز شىعۋعا بولمايدى. كاسىپكەرلەر شىدامدى بولۋى كەرەك. ءتارتىپتى ساقتاعان ءجون»، - دەدى نۇرسۇلۋ بەركىمبايەۆا.
ەسكە سالساق، وتكەن اپتادا اقتوبەدە بالاباقشالار جۇمىسى كەيىنگە شەگەرىلگەن بولاتىن.
