باس سانيتارلىق دارىگەر: كوپشىلىك كوروناۆيرۋستىڭ قاۋپىن جەتە باعالاماي وتىر
«بۇگىنگى كۇنى كوروناۆيرۋس ينفەكسياسى سيمپتومدارىمەن مەديتسينالىق كومەككە جۇگىنگەن ادامداردىڭ سانى ارتىپ وتىر. ءبىر اپتا ىشىندە مۇنداي ادامداردىڭ سانى 40 پايىزعا، وتكەن اپتاعا قاراعاندا پايىزعا شاققاندا 15-تەن 17,5 پايىزعا ءوستى. وزدىگىنەن مەديتسينالىق كومەككە جۇگىنگەندەردىڭ ارتۋى نۇر- سۇلتان، الماتى قالالارىندا، پاۆلودار، اقتوبە، قوستاناي وبلىستارىندا بايقالادى»، - دەدى باس سانيتارلىق دارىگەر ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، وزدىگىنەن مەديتسينالىق كومەككە جۇگىندەر سانىنىڭ ارتۋى ادامداردىڭ ۆيرۋستان قورعانۋ شارالارىن ساقتامايتىندىعىن كورسەتىپ وتىر.
«وكىنىشكە وراي، كوپشىلىگى كوروناۆيرۋس ينفەكسياسى قاۋپىن جەتە باعالاماي وتىر. بۇل وتە جۇقپالى اۋرۋ ەكەندىگىن، اعزا ءۇشىن ءىز- ءتۇسسىز وتپەيتىندىگىن، ەڭ الدىمەن جاسى ۇلكەن جاقىندارىمىز - اتا- اجەلەرىمىزگە، اتا- انالارىمىزعا قاۋىپتى ەكەندىگىن ەسكتەرىڭىزگە سالعىم كەلەدى»، - دەدى ول.
وسى رەتتە باس سانيتارلىق دارىگەر كوروناۆيرۋس ينفەكسياسىمەن سىرقاتتانۋ ءوسىمىنىڭ سەبەبىنە ساراپتاما جۇرگىزىلگەندىگىن اتاپ ءوتتى. «ءبىرىنشىسى - سانيتارلىق زالالسىزداندىرۋ رەجيمىن كۇشەيتۋ جونىندەگى بەلگىلەنگەن تالاپتاردى ساقتاماعان، ماسكا تاقپاعان، اراشىقتىق ساقتاماعان، بايلانىستاردى ازايتپاعان ەڭبەك ۇجىمداردا تارالۋى. ەكىنشىسى - ەڭبەك ۇجىمىنان تىس الەۋمەتتىك بايلانىستاردىڭ ارتۋى. ءبىز قوناققا بارىپ، ءوزىمىز دە قوناق شاقىرىپ جاتىرمىز جانە مامانداردىڭ كەڭەستەرىنە قاراماستان گيگيەنالىق جانە ءوزىڭدى قورعاۋدىڭ قاراپايىم تالاپتارى ورىنداۋدى - ماسكا تاعۋدى، انتيسەپتيكتەردى پايدالانۋدى، اراقاشىقتىق ساقتاۋدى قويدىق»، - دەدى ايجان ەسماعامبەتوۆا.
