تالدىقورعاندا ءۇش تۇرعىن ۇيدەگى كىرەبەرىسى كارانتينگە جابىلدى
ولاردىڭ بارلىعى قاراتال شاعىن اۋدانىندا ورنالاسقان 57- ءۇيدىڭ 3- كىرەبەرىسى، 59ب ءۇيدىڭ 1- كىرەبەرىسى، 60ب ءۇيدىڭ №1 كىرەبەرىسى.
«الماتى وبلىسىندا كوروناۆيرۋس جۇقتىرۋعا قاتىستى 7 جاعداي تىركەلدى. ونىڭ ۇشەۋى تالدىقورعان قالاسىندا، ەكەۋى كەگەن اۋدانىندا، قاپشاعاي قالاسى مەن تالعار اۋدانىندا ءبىر- ءبىر ادامنان انىقتالدى. 5 پاتسيەنتتىڭ سىرقات جۇقتىرعانى پروفيلاكتيكالىق تەكسەرۋ بارىسىندا انىقتالعان. ەكەۋى مەديتسينالىق مەكەمەگە ءوز بەتىنشە جۇگىنۋى بارىسىندا بەلگىلى بولدى. ناۋقاستاردىڭ بارلىعى جۇقپالى اۋرۋلار بولىمىنە جاتقىزىلدى. ولارمەن 91 ادامنىڭ بايلانىستا بولعانى ناقتىلاندى. بارلىعى باقىلاۋعا الىنىپ، ەپيدەميولوگيالىق تەكسەرۋ جاسالۋدا»، - دەپ مالىمدەدى الماتى وبلىسى اكىمىنىڭ باسپا ءسوز قىزمەتىنەن.
سونىمەن قاتارى تالدىقورعاندا تاعى ءۇش مەكەنجاي ءتيىستى قاۋلىعا سايكەس ىندەت وشاعى دەپ تانىلىپ، كارانتينگە الىندى. جالپى الماتى وبلىسىندا COVID-19 ينفەكسياسىن جۇقتىرعان 219 ادام تىركەلدى.
اۆتور: سامال قابىشيەۆا
