سولتۇستىك قازاقستاندا كارانتين كەزىندە اجىراسۋ كۇرت ازايعان

پەتروپاۆل. قازاقپارات - سولتۇستىك قازاقستان وبلىسىندا توتەنشە جاعداي كەزىندە اجىراسۋ كۇرت ازايىپ، شەتەلدىككە كۇيەۋگە شىققاندار سانى ارتقان، دەپ حابارلايدى قازاقپارات ءتىلشىسى.

س ق و ادىلەت دەپارتامەنتىنىڭ مالىمەتىنشە، وڭىردە جىل باسىنان 808 جۇپ نەكەسىن زاڭداستىرعان. ونىڭ 75 ىندە سولتۇستىك قازاقستاندىقتار شەتەلدىكتەرمەن شاڭىراق كوتەردى.

«بىلتىر وسى ارالىقتا 1 مىڭ 29 نەكە قيىلدى. ونىڭ قىرىعى شەتەلدىكپەن نەكەگە وتىردى. بيىل جالپى نەكەگە وتىرۋشىلاردىڭ ازايۋىنا كارانتين شەكتەۋلەرى سەبەپ بولۋى مۇمكىن. سونداي-اق بىلتىر 677 جۇپ نەكەسىن بۇزسا، بيىل جىل باسىنان 15- مامىرعا دەيىن 384 وتباسى اجىراسۋعا ءوتىنىش بەردى»، - دەيدى س ق و ادىلەت دەپارتامەنتىنىڭ ءبولىم جەتەكشىسى تاتيانا گوريچيەۆا.

ال 1- ءساۋىر مەن 15- مامىر ارالىعىندا 130 جۇپ نەكەسىن زاڭداستىرۋ ءۇشىن ونلاين ءوتىنىش بەرگەن.

وسى ۋاقىتتا 22 وتباسى اجىراسىپ كەتتى. 2019-جىلى وسى ارالىقتا 243 شاڭىراق بۇزىلعان. پەتروپاۆل قالاسىنىڭ ازاماتتىق حال اكتىلەرىن تىركەۋ ءبولىمى توتەنشە جاعداي كەزىندە 600 دەن استام ەلەكتروندى ءوتىنىش قابىلداعان. ءبولىم جەتەكشىسى بايان احمەتوۆانىڭ ايتۋىنشا، ماماندار بالانىڭ تۋۋىن، نەكە قيۋ، اجىراسۋ، قايتىس بولۋدى ونلاين تىركەپ وتىردى.

وسى ارالىقتا 188 جۇپ نەكەسىن تىركەسە، 31 ءى نەكە قيۋعا ءوتىنىش بەرگەن. سونداي-اق ومىرگە كەلگەن 295 ءسابي تىركەلدى. ەندى تۇرعىندار سانيتارلىق نورمالاردى ساقتاي وتىرىپ، دايىن قۇجاتتاردى كەلىپ اكەتە الادى.