قازاقستاندا حالىقارالىق تاسىمالداردى قاداعالاۋدىڭ اقپاراتتىق جۇيەسى قۇرىلادى
بۇعان قاتىستى ءتيىستى زاڭ جوباسى بۇگىن پارلامەنت ءماجىلىسىنىڭ قابىرعاسىندا تانىستىرىلدى، دەپ حابارلايدى قازاقپارات ءتىلشىسى.
«ق ر كەيبىر زاڭنامالىق اكتىلەرىنە حالىقارالىق اۆتوموبيل تاسىمالدارىن قاداعالاپ وتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ناۆيگاتسيالىق پلومبالاردى پايدالانا وتىرىپ، ترانزيتتىك تاسىمالدى قاداعالاۋ بويىنشا مەملەكەت باسشىسى بەرگەن تاپسىرمانى ورىنداۋ ماقساتىندا ازىرلەندى. زاڭ جوباسى ارقىلى اكىمشىلىك قۇقىق بۇزۋشىلىق تۋرالى كودەكسكە، سونىمەن بىرگە كولىك قۇرالدارى تۋرالى زاڭعا وزگەرىستەر ەنگىزۋدى كوزدەپ، حالىقارالىق تاسىمالداردى قاداعالاۋدىڭ اقپاراتتىق جۇيەسى، ناۆيگاتسيالىق پلومبالار سەكىلدى تۇسىنىكتى ەنگىزۋدى قاراستىرادى»، - دەدى زاڭ جوباسىن تانىستىرعان دەپۋتات پاۆەل كازانتسيەۆ.
سونىمەن قاتار زاڭ جوباسى ق ر ۇكىمەتىنە حالىقارالىق تاسىمالداردى قاداعالاپ وتىرۋ جۇيەسىنىڭ ۇلتتىق وپەراتورىن ايقىنداۋ بويىنشا قۇزىرەتتىلىك بەرۋدى، حالىقارالىق اۆتوموبيل تاسىمالدارىن جۇزەگە اسىرۋ كەزىندە ەلەكتروندىق سايكەستەندىرگىشتەردى (ناۆيگاتسيالىق پلومبالاردى) پايدالانۋ بولىگىندە تاسىمالداۋشىلارعا قويىلاتىن تالاپتاردى بەلگىلەۋدى، ەلەكتروندىق سايكەستەندىرگىشتەردى قاساقانا بۇلدىرگەنى نەمەسە جويعانى ءۇشىن اكىمشىلىك جاۋاپتىلىقتى ەنگىزۋدى كوزدەيدى.
سونىمەن قاتار، زاڭ جوباسىندا ەلەكتروندىق سايكەستەندىرگىشتەردى پايدالانۋ ءتارتىبىن سالىق جانە بيۋدجەتكە تولەنەتىن باسقا دا مىندەتتى تولەمدەردىڭ ءتۇسۋىن قامتاماسىز ەتۋ سالاسىندا باسشىلىقتى جۇزەگە اسىراتىن ۋاكىلەتتى ورگاننىڭ بەكىتۋى ۇسىنىلادى.
