قازاقستانعا كىرگەن جۇك كولىگىنىڭ بارىنە ناۆيگاتسيالىق پلومبا ورناتىلادى
وسىلايشا مەملەكەتتىك كىرىستەر كوميتەتى ەل اۋماعىنداعى جۇك تاسىمالىن قاداعالاپ وتىرادى، دەپ حابارلايدى قازاقپارات ءتىلشىسى.
«جىل سايىن ە ا ە و- عا مۇشە مەملەكەتتەردەن قازاقستانعا كەلەتىن كولىكتەردىڭ سانى ارتىپ كەلەدى. سول سەبەپتى ءبىزدىڭ الدىمىزداعى وتكىر ماسەلەنىڭ ءبىرى - زامانعا ساي تەحنولوگيالاردى پايدالانا وتىرىپ، ولاردى قاداعالاۋ. سوندىقتان ناۆيگاتسيالىق پلومبا ينستيتۋتىن ەنگىزىپ جاتىرمىز. مۇنداي ناۆيگاتسيالىق پلومبالاردى كولىككە تاعۋ جۇمىسى بار-جوعى ءبىر مينۋت ۋاقىتتى الادى»، - دەدى قارجى ۆيتسە-ءمينيسترى قانات باەديلوۆ ءماجىلىستىڭ جالپى وتىرىسىندا. قارجى ۆيتسە-ءمينيسترى بۇل رەتتە ناۆياتسيالىق پلومبالار نە ءۇشىن قولدانىلاتىنىن ايتىپ بەردى.
«قازاقستان شەكاراسىنا جۇك كولىگى قالاي كەلەدى - ءبىز بىردەن سول كولىككە پلومبالاردى قوسىپ، ىسكە قوسامىز. ناۆيگاتسيالىق پلومبانىڭ سيگنالى مەملەكەتتىك كىرىستەر كوميتەتىنىڭ سيتۋاتسيالىق ورتالىعىنا تۇسەدى. ءبىز بۇل اۆتوكولىك قۇرالدارىنىڭ قوزعالىسىن باقىلاپ وتىرامىز. ەگەر كولىك جوسپاردان تىس باسقا جولمەن كەتسە نەمەسە ناۆياتسيالىق پلومبا ادەيى الىنىپ تاستالسا - مەملەكەتتىك كىرىستەر كوميتەتى جەدەل ارەكەت ەتەدى. ءبىزدىڭ قولىمىز ۇزىن. وڭىرلەردىڭ بارىندە مەملەكەتتىك كىرىستەر كوميتەتىنىڭ وڭىرلىك بولىمشەلەرى بار. زاڭ جوباسىن ازىرلەۋ بارىسىندا مەملەكەتتىك كىرىستەر كوميتەتى، ىشكى ىستەر مينيسترلىگى مەن ەكونوميكالىق تەرگەۋ قىزمەتى ءوزارا ارەكەت ەتۋ ءتارتىبىن رەتكە كەلتىرەدى. تيىسىنشە ەرەجە بۇزۋشىلارعا ۋاقتىلى ارەكەت ەتەتىن كۇش پەن قۇزىرەت بولادى»، - دەدى ول.
ەسكە سالا كەتسەك بۇگىن پارلامەنت ماجىلىسىندە «ق ر كەيبىر زاڭنامالىق اكتىلەرىنە حالىقارالىق اۆتوموبيل تاسىمالدارىن قاداعالاپ وتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلعان بولاتىن.
