جاساندى جۇرەك پەن وكپەگە قوسىلعان قازاقستاندىق كوروناۆيرۋستان ەمدەلىپ شىقتى
«كۇنىمىزدى جاقسى جاڭالىقتان باستاپ وتىرمىز. COVID-19 ىندەتىمەن ءبىرىنشى بولىپ ەكمو اپپاراتىنا (جۇرەك پەن وكپە فۋنكتسياسىن قولداۋعا ارنالعان ەكستراكورپورالدى مەمبراندىق وكسيگەناتسيا اپپاراتى) قوسىلعان ناۋقاس ەمدەلىپ شىقتى. ەر ادام ءوزىنىڭ 30 جاسقا تولعان مەرەيتويىن وسى اپپاراتتا قوسىلعان كۇيىندە قارسى العان ەدى. قازىر ونىڭ جاعدايى جاقسى»، - دەلىنگەن ۇلتتىق عىلىمي كارديوحيرۋرگيا ورتالىعىنىڭ مالىمەتىندە.
ايتا كەتەيىك، وسى قۋانىشتى وقيعا رەسپۋبليكالىق قارقىندى تەراپيا ورتالىعى دارىگەرلەرى مەن توتەنشە جاعداي كەزەڭىنە قۇرىلعان ساراپشىلىق توپتىڭ جەمىستى ءارى بىرلەسكەن جۇمىسىنىڭ ناتيجەسى بولىپ وتىر.
ساراپشىلىق توپ كوروناۆيرۋس ينفەكسياسىنا شالدىققان ناۋقاستارعا قارقىندى تەراپيا كورسەتۋ ءۇشىن قۇرىلعان بولاتىن. ساراپشىلىق توپتىڭ نەگىزگى ماقساتى - ەلىمىزدەگى مەديتسينالىق ۇيىمداردا COVID-19 جۇقتىرعان اۋىر جاعدايداعى بارلىق ادامداردى ەمدەۋ ءارى دياگنوستيكالىق كومەك كورسەتۋ ءتاسىلىن ۇيلەستىرۋ مەن قاداعالاۋ. ەلىمىزدەگى بارلىق ناۋقاستار ساراپشىلىق توپ پەن رەسپۋبليكالىق قارقىندى تەراپيا ورتالىعى ماماندارىنىڭ تۇراقتى باقىلاۋىندا بولدى. كۇن سايىن كوسيليۋم وتكىزىلىپ، سودان كەيىن ينفەكسيا جۇقتىرعان ناۋقاستاردى ەمدەۋگە قاتىستى شەشىمدەر جاسالىپ وتىردى.
