الماتى وبلىسىندا بارىمتاشىلار ءىرى قارانى مىلتىقپەن اتىپ، جايىلىمنان ۇرلاعان

تالدىقورعان. قازاقپارات - الماتى وبلىسىندا ءبىر توپ بارىمتاشى سيىرلاردى اتىپ ءولتىرىپ، جايىلىمنان ۇرلاعان، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جەدەل اقپاراتتى تەكسەرۋ بارىسىندا پوليتسەيلەر جايىلىمدارداعى سيىرلاردى اتقان بارىمتاشىلار توبىن قولعا ءتۇسىردى.

تاركىلەنگەن اڭشى مىلتىقتارى دا زاڭدى تىركەلمەگەنى انىقتالدى.

«اقجار اۋىلىنىڭ ماڭىندا ورنالاسقان جايىلىمنان ەكى سيىردىڭ ۇرلانعانى تۋرالى اقپاراتتى العان سوڭ، كۇدىكتىلەردىڭ قايتۋ جولىن جورامالداپ، تۇزاق ۇيىمداستىردىق. الايدا، بارىمتاشىلار وتە ساق قيمىلدادى. ەكى جەڭىل اۆتوكولىك ارقىلى ۇرلانعان ولجانى تاسىمالداعان ولار پوليتسەيلەردى كورىپ، سەزىكتەنگەن. ساقتىق ءۇشىن كۇدىكتىلەر بەكەتكە جەتپەي سيىر ەتىن ءتۇسىرىپ، ونى جاسىرعان. الايدا، جۇكسىز كەتىپ قالۋعا تىرىسقان كۇدىكتىلەر ۇستالدى»، - دەيدى الماتى وبلىسى قاراتال اۋداندىق پوليتسيا ءبولىمىنىڭ باستىعى راۋان ابدرايموۆ.

اۆتوكولىكتەردى تەكسەرۋ بارىسىندا قان ءىزى بار ەكى ۇڭعىلى اڭشى مىلتىعى جانە باسقا دا دالەلدەر تابىلدى.

23، 25، 29 جانە 34 جاستاعى ءتورت كۇدىكتى ۇرلىق جاساعاندارىن تولىق مويىنداپ، سويىلعان سيىرلاردى جاسىرعان ورىندارىن كورسەتتى.

«ۇستالعان ازاماتتاردىڭ 2018، 2019 جانە 2020-جىلدارى جاسالعان ءىرى قارا ۇرلىعىنىڭ تاعى بەس ەپيزودىنا قاتىستىلىعى دالەلدەندى. كۇدىكتىلەر ەتتى بازارلارعا جانە ءوزىنىڭ تانىستارىنا وتكىزگەن، ال تۇسكەن اقشانى جەكە قاجەتتىلىكتەرىنە جۇمساعان. قىلمىستىق توپتىڭ بارلىق قاتىسۋشىلارى قاماۋعا الىندى. ال ولارعا مال ەتىن تاسىمالداۋدا كومەكتەسكەن اۆتوكولىك ارنايى تۇراققا قويىلدى»، - دەپ تولىقتىردى ر. ابدرايموۆ.