كۇزدە دە كارانتيندىك شارالار قابىلدانۋى مۇمكىن - دەنساۋلىق مينيسترلىگى
بۇل تۋرالى ق ر دەنساۋلىق ساقتاۋ ۆيتسە- ءمينيسترى ليۋدميلا بيۋرابەكوۆا ءمالىم ەتتى، دەپ حابارلايدى قازاقپارات ءتىلشىسى.
ونلاين تارتىپتە وتكەن باسپا ءسوز ءماسليحاتىندا كۇزدە كوروناۆيرۋستىڭ ەكىنشى تولقىنى بولاتىندىعى تۋرالى پىكىرلەرگە قاتىستى سۇراق قويىلدى. بۇل تۇرعىدا كاسىپورىنداردىڭ جۇمىسىنا شەكتەۋ ەنگىزۋ مۇمكىندىگى جايىندا سۇرالدى.
«شىنىمەن دە كۇزدە ءبىز ۆيرۋستىڭ ەكىنشى تولقىنى كەلۋى مۇمكىن ەكەنىن جوققا شىعارمايمىز. الايدا كۇزدە قابىلداناتىن شارالار جاعدايعا قاراي ىسكە اسىرىلادى، ياعني سول كەزدەگى ەپيدەميولوگيالىق احۋال نازارعا الىنادى. كۇزدە قانداي دا ءبىر كارانتيندىك شارالار قابىلدانۋى مۇمكىن، بۇل قادامدار ىندەتتىڭ تارالۋى قاۋپىنە بايلانىستى بولادى»، - دەدى ۆيتسە- مينيستر. بۇدان بۇرىن حابارلانعانداي، ق ر د س م قوعامدىق دەنساۋلىق ساقتاۋ ۇلتتىق ورتالىعى ديرەكتورى دامير كوبجاساروۆ كوروناۆيرۋستىڭ ەكىنشى تولقىنى قاي كەزدە كەلۋى مۇمكىن ەكەنىن ايتتى.
«ىندەت جۇقتىرۋ كورسەتكىشتەرى ارتۋىنىڭ ەكىنشى كەزەڭى كۇز مەرزىمىنىڭ ەكىنشى بولىگىنە كەلۋى مۇمكىن. ەل حالقى ۆيرۋستىڭ بار ەكەنىن ۇمىتپاۋى كەرەك. بۇل ىندەت بارشا الەمدە تولىقتاي جويىلمادى. كەيبىر ادامداردا بۇل اۋرۋ ەشبىر بەلگىلەرسىز بولادى، كەيىننەن بۇل ينفەكسيا اعزاسى ىندەتكە سەزىمتال كىسىلەرگە جۇعۋى مۇمكىن»، - دەدى د. كوبجاساروۆ ونلاين تارتىپتە وتكەن بريفينگتە.
اۆتور: رۋسلان عابباسوۆ
