بەيبىت اتامقۇلوۆ «ازيا اۆتو» ا ق توڭىرەگىندەگى ماسەلەنى ءتۇسىندىردى
«2010 -جىلى ماۋسىمدا «ازيا اۆتو» ا ق ونەركاسىپتىك اۆتوكولىك قۇراستىرۋ تۋرالى كەلىسىمگە قول قويدى. بۇل كەلىسىم بويىنشا 7 جىلدا - 2017 -جىلدىڭ 1 - ماۋسىمىندا ولار مىندەتتى تۇردە ينۆەستيتسيا سالىپ، تەحنولوگيالىق دانەكەرلەۋ جانە كولىك شاناعىن بوياۋ ءوندىرىسىن اشادى دەگەن شارت بولدى. 2017 -جىلى بۇل مىندەتتەمەلەر ورىندالمادى.
ودان بولەك، 2017 -جىلعى جەلتوقساندا «ازيا اۆتو قازاقستان» ا ق- مەن 2019 -جىلدىڭ 1 - جەلتوقسانىنان باستاپ ءدال وسى مىندەتتەمەلەردى ورىنداۋ تۋرالى كەلىسىمگە قول قويىلدى. «ازيا اۆتو» جانە «ازيا اۆتو قازاقستان» ا ق ءوز مىندەتتەمەلەرىن ورىنداۋعا دايىن ەمەستىگىن ەسكەرە وتىرىپ، 2017 -جىلدىڭ باسىندا ولار مينيسترلىككە جۇگىنىپ، 2019 -جىلدىڭ 1 جەلتوقسانىنا دەيىن ونەركاسىپتىك قۇراستىرۋ تۋرالى كوپجاقتى كەلىسىم جاساسۋدى سۇرادى. وسىلايشا، مينيسترلىك بۇل كاسىپورىنعا بىرنەشە رەت قارايلاسىپ كەلدى»، - دەدى مينيستر ۇكىمەتتە وتكەن باسپا ءسوز ءماسليحاتىندا.
ءمينيستردىڭ ايتۋىنشا، بيىل 1 - ساۋىردە «ازيا اۆتو» جانە «ازيا اۆتو قازاقستان» ۇسىنعان ەسەپتەن كەيىن ولاردىڭ دانەكەرلەۋ مەن كولىك شاناعىن بوياۋ مىندەتتەمەلەرىن ورىنداماعانى انىقتالدى.
«11 - ساۋىردە مينيسترلىك بۇل كاسىپورىندارعا كەمشىلىكتەردى جويۋ تۋرالى ەسكەرتۋ جىبەردى. ءبىر اي ىشىندە ەسكەرتۋدى ورىنداماسا، بۇل كەلىسىمشارتتاردىڭ بۇزىلۋىنا جانە باسىمدىقتاردىڭ توقتاتىلۋىنا نەگىز بولا الادى. بۇل كەلىسىمدە ونەركاسىپتىك قۇراستىرۋ تۋرالى كەلىسىمنىڭ شارتتارىن ورىنداۋدان باسقا جول جوق. سونىمەن بىرگە، كەلىسىمنىڭ بۇزىلۋىنان كەيبىر ب ا ق پەن الەۋمەتتىك جەلىلەردە حابارلانعانداي، كاسىپورىن جۇمىسى توقتامايدى. كاسىپورىندار ءوز مىندەتتەمەلەرىن ورىنداعاننان كەيىن مينيسترلىك كەلىسىم جاساۋ مەن باسىمدىقتار بەرۋ مۇمكىندىگىن قاراستىرۋعا دايىن»، - دەدى ب. اتامقۇلوۆ.
اۆتور: ايجان سەرىكجان قىزى
