الماتى وبلىسىندا كوروناۆيرۋس ينفەكسياسىنىڭ ءۇش وشاعى بار

تالدىقورعان. قازاقپارات - ەپيدەميولوگيالىق جاعدايدىڭ كۇرت وزگەرۋىنە بايلانىستى كەگەن، تالعار اۋداندارىندا، سونداي- اق تالدىقورعان قالاسىندا كارانتين رەجيمى كۇشەيتىلدى، دەپ حابارلايدى قازاقپارات ءتىلشىسى.

بۇل تۋرالى الماتى وبلىسى دەنساۋلىق ساقتاۋ باسقارماسىنىڭ باسشىسى باۋىرجان ىسقاق مالىمدەدى. ونىڭ ايتۋىنشا، ىندەت جۇقتىرۋدىڭ جاڭا جاعدايلارى وسى وڭىرلەردە تىركەلگەن. وسىعان سايكەس ساقتىق شارالارى قايتادان كۇشەيتىلىپ وتىر.

«بۇگىنگى تاڭدا الماتى وبلىسىندا كوروناۆيرۋسپەن اۋىرعاندار سانى 212-گە جەتتى. ونىڭ ىشىندە 73 پاتسيەنت ستاتسيونارلىق ەمدەلۋدە. ناۋقاستارمەن 2254 ادام بايلانىستا بولعان. ولاردىڭ بارلىعى مەديتسينالىق باقىلاۋعا الىندى. ەپيدەميولوگيالىق زەرتتەۋ جۇرگىزىلىپ جاتىر. قازىرگى ۋاقىتتا كوروناۆيرۋس ينفەكسياسىنىڭ بەلسەندى 3 وشاعى بار. بۇل - تالعار، كەگەن اۋداندارى مەن تالدىقورعان قالاسى. دەمەك، كارانتين شارالارى كۇشەيەدى»، - دەپ اتاپ ءوتتى باۋىرجان ىسقاق.

كۇردەلى ەپيدەميولوگيالىق جاعدايعا قاراماستان، الماتى وبلىسىندا كارانتيندى كەزەڭ- كەزەڭمەن جەڭىلدەتۋ جالعاسۋدا. سونىمەن، 18 - مامىردان باستاپ وبلىستىڭ باس مەملەكەتتىك سانيتار دارىگەرىنىڭ جاڭا قاۋلىسىنا سايكەس، بلوكپوستار الىنىپ، ماڭىزدى نىساندار جۇمىسقا كىرىسەدى.

اۆتور: سامال قابىشيەۆا