زەلەنسكي ورازا جانە قۇربان ايتتى مەملەكەتتىك مەرەكە قاتارىنا قوسپاقشى

نۇر -سۇلتان. قازاقپارات - ۋكراينا پرەزيدەنتى ۆلاديمير زەلەنسكي قىرىمنىڭ بايىرعى حالىق وكىلدەرىمەن كەزدەسىپ، الداعى ۋاقىتتا مۇسىلماندار ءۇشىن ەكى ماڭىزدى مەرەكەگە مەملەكەتتىك مارتەبە بەرۋگە نيەتتى ەكەنىن جەتكىزدى.

سونداي- اق قىرىم تاتارلارىنىڭ ماسەلەسى بويىنشا جۇمىس توبىن قۇرۋ ماسەلەسىن كوتەردى دەپ حابارلايدى KAZ. NUR. KZ پورتالى ۋكراينا پرەزيدەنتىنىڭ باسپا ءسوز قىزمەتىنە سىلتەمە جاساپ.

«ءبىز ءاربىر ادام ءوزىن ۋكراينانىڭ ازاماتى رەتىندە سەزىنەتىن مەملەكەت قۇرعىمىز كەلەدى. مەن ءارقايسىسى حالقىنىڭ تاريحى مەن ءداستۇرىن ۇمىتپاعان تولىققاندى ازامات رەتىندە سەزىنگەنىن قالايمىن. ءبىز سىزدەردى تەك سوزبەن عانا ەمەس، زاڭ جۇزىندە دە قولداعىمىز كەلەدى»، - دەدى پرەزيدەنت.

زەلەنسكي جاقىن ارادا قۇربان ايت پەن ورازا ايت مەرەكەلەرىنە مەملەكەتتىك مارتەبە بەرۋ تۋرالى جارلىق شىعاراتىنىن مالىمدەدى. سونداي-اق، ۋكراينا پرەزيدەنتى سىرتقى ىستەر ءمينيسترىنىڭ ءبىرىنشى ورىنباسارى قىزمەتىنە ەمينا جاپاروۆانىڭ كانديداتۋراسىن ۇسىناتىنىن دا ايتا كەتتى. زەلەنسكي وسىعان بايلانىستى، پرەزيدەنت كەڭسەسىنىڭ جانىنان قىرىم تاتارلارىنىڭ ماسەلەسىن شەشۋمەن اينالىساتىن جۇمىس توبىن قۇرۋدى ۇسىندى.

ەسكە سالا كەتسەك، وسىعان دەيىن بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش قازاقستان پرەزيدەنتى قاسىم-جومارت توقايەۆقا قوڭىراۋ شالىپ، العىسىن بىلدىرگەن. ول مەملەكەت باسشىسىن حالىقارالىق فورۋمعا شاقىردى.