شىمكەنتتە قىزمەتكەرلەرىنە تولەماقىنى دۇرىس بەرمەگەن باس دارىگەر قىزمەتىنەن بوساتىلدى
بۇل تۋرالى قالا اكىمىنىڭ ءبىرىنشى ورىنباسارى ەربول سادىر مالىمدەدى، دەپ حابارلايدى قازاقپارات ءتىلشىسى.
ەربول سادىردىڭ ايتۋىنشا، قالاداعى مەديتسينا قىزمەتكەرلەرىنە بەرىلەتىن ۇستەمەاقىعا قاتىستى تەكسەرۋ جۇمىستارى اياقتالعان.
ايتا كەتەيىك، وتكەن اپتادا ستەريلدەۋ ورتالىعىنىڭ ماماندارى باسشىلارىنا سەنىمسىزدىك تانىتىپ، تيەسىلى ۇستەمەاقىنى تولىق المايتىندارىن ايتقان بولاتىن. ال، جەدەل جاردەم قىزمەتكەرلەرى ۇستەمەاقىلارىن تولىق كولەمدە الا الماي وتىرعاندارىن جەتكىزگەن. وسى جاعدايلارعا بايلانىستى قالا اكىمىنىڭ تاپسىرماسىمەن جۇمىس توبى قۇرىلىپ، ەكى مەكەمەدە تەكسەرۋ جۇرگىزىلگەن.
«تەكسەرۋ جۇمىستارىنىڭ قورىتىندىسى بويىنشا ستەريلدەۋ ورتالىعىنىڭ قىزمەتكەرلەرىنە تولەماقى مەن جاردەماقىلارىن قوسىمشا تولەۋ بارىسىندا ورەسكەل زاڭبۇزۋشىلىقتارعا جول بەرىلگەنى انىقتالدى. سوعان بايلانىستى ورتالىقتىڭ باس دارىگەرى قىزمەتىنەن بوساتىلدى. ونداعى مەديتسينالىق قىزمەتكەرلەردىڭ ايلىقتارىنىڭ بارلىعى قايتا ەسەپتەلىپ، قوسىمشا جاردەماقىلارى تولەندى»، - دەدى قالا اكىمىنىڭ ءبىرىنشى ورىنباسارى.
ەربول سادىر، سونداي-اق، جەدەل جاردەم ورتالىعىندا جۇمىستاردى ۇيىمداستىرۋ بارىسىندا ءتۇسىندىرۋ مەن جەدەل جاردەمدى باعىتتاۋ بارىسىندا قىزمەتكەرلەرگە ءبىر دەڭگەيدە قوسىمشا قارجى تولەنبەگەنىن جەتكىزدى.
«وسى جاعدايدى ەسكەرە وتىرىپ، ءبىز ارنايى تولەمدەردىڭ كولەمىن جوعارىلاتتىق. جۇرگىزۋشىلەرگە 125 مىڭ تەڭگەگە دەيىن، دارىگەرلەر مەن فەلدشەرلەرگە 250 مىڭ تەڭگەگە دەيىن كوتەردىك. كىشى مەديتسينالىق پەرسونالدارعا «حالىق بانكىنىڭ» دەمەۋشىلىگىمەن 40 مىڭ تەڭگەدەن قوسىمشا قارجى تولەپ بەردىك. ياعني، جەدەل جاردەم قىزمەتىنىڭ ماماندارىنا ساناتتارىنا سايكەس قوسىمشا ۇستەمەاقىلارى تولەنەدى. جەدەل جاردەم ستانتسياسى باسشىلىعىنا شارا قولدانۋ ماسەلەسى قارالۋدا»، - دەدى شەنەۋنىك.
