باس ءمۇفتي ماقتاارالدىق ءۇش وتباسىعا باسپانانىڭ كىلتىن تابىس ەتتى

ماقتاارال. قازاقپارات - قازاقستان مۇسىلماندار ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى سۋ تاسقىنى بولعان ماقتاارال اۋدانىنا كەلىپ، تۇرعىندارمەن كەزدەستى.

ول توپان سۋدان زارداپ شەككەن اۋىل تۇرعىندارىنىڭ قازىرگى جاعدايىمەن تانىستى، دەپ حابارلايدى قازاقپارات ءتىلشىسى.

«Nur Otan» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆ باس مۇفتيگە سۋ العان اۋىلدار مەن ەۆاكۋاتسيالىق بەكەتتەردە جۇرگىزىلىپ جاتقان جۇمىستارىمەن تانىستىردى.

ناۋرىزباي قاجى تاعان ۇلى ماقتاارال اۋىلدىق وكرۋگى مەن اتاكەنت كەنتىندەگى ەۆاكۋاتسيالىق بەكەتتەردە بولىپ، سوندا ۋاقىتشا ورنالاستىرىلعان تۇرعىندارعا اۋىزاشارعا ارناپ «رامازان ءتاتتىسىن» ۇسىندى.

الىپ كەلگەن 30 توننا ۇندى ورتالىق قويماعا تابىستاپ، وبلىستىق قايىرىمدىلىق قورىنا كومەك رەتىندە اۋدارىلاتىن 10 ميلليون تەڭگەنىڭ سەرتيفيكاتىن تابىستادى.

«اپات ايتىپ كەلمەيدى. جاراتۋشى بىزگە وسىنداي سىناق بەرگەن ەكەن. ەندەشە سابىر ساقتاي وتىرىپ، سىنان سۇرىنبەي ءوتۋدى جازسىن دەپ تىلەيىك. وزدەرىڭىز بىلەتىندەي، ەلىمىزدىڭ تۇكپىر-تۇكپىرىنەن كوپتەگەن كومەك ارقىلى بارشا حالىق قولداۋ تانىتىپ جاتىر. كومەك قولىن سوزىپ ماقتاارالدىقتارمەن بىرگە ەكەنىن ءبىلدىرىپ جاتقان بارلىق ازاماتتارعا اللا رازى بولسىن. «ءاربىر ءىستىڭ قايىرى بولادى» دەمەكشى اللا قالاسا ۇكىمەت تاراپىنان سالىنىپ جاتقان سۋ جاڭا ۇيلەرگە قونىستاناتىن بولاسىزدار. بۇدان كەيىن قۋانىشتى كۇندەر كوپ بولسىن»، - دەدى باس ءمۇفتي.

ساپار سوڭىندا ناۋرىزباي قاجى جەتىساي اۋدانىندا بولىپ، «باسپاناعا جول» قايىرىمدىلىق قورى ەسەبىنەن سالىنعان 3 بىردەي ءۇيدىڭ كىلتىن الەۋمەتتىك از قامتىلعان وتباسىلارعا سالتاناتتى تۇردە تابىس ەتتى.