كوروناۆيرۋسپەن كۇرەس: د د ۇ باسشىسى الەمدىك قاۋىمداستىققا ۇندەۋ جاسادى
وعان الەمنىڭ 194 مۇشە-مەملەكەتىنىڭ وكىلى قاتىسۋدا، دەپ حابارلايدى قازاقپارات ءتىلشىسى.
اسسامبلەيانىڭ اشىلۋىندا ق ح ر ءتوراعاسى شي جينپيڭ، فرانسيا پرەزيدەنتى ەممانۋەل ماكرون، گەرمانيا كانتسلەرى انگەلا مەركەل، وڭتۇستىك كورەيا باسشىسى مۋن چجە ين، سونداي-اق وڭتۇستىك افريكا رەسپۋبليكاسى مەن افريكا ەلدەرىنىڭ پرەزيدەنتتەرى ءسوز سويلەدى.
«ءبىز - الەم مەملەكەتتەرى داعدارىسقا قارسى تۇرۋ ءۇشىن بىرىكتىك. ۆيرۋسپەن كۇرەستى جالعاستىرىپ جاتقاندارعا قولداۋ بىلدىرەمىز. بۇل قيىندىقتى بىرىكسەك قانا جەڭە الامىز، سول ءۇشىن بولاشاققا ءۇمىت ارتامىز. الەم بۇدان بۇرىن دا پاندەميامەن بەتپە-بەت كەلگەن. ايتسە دە، كوروناۆيرۋس پاندەمياسى وتە قاۋىپتى. ۆيرۋس، وكىنىشكە قاراي، تەز تارالادى ءارى ەم قابىلداماسا ولىمگە اكەلەدى... شىنىندا دا، ول ورمانداعى وت سياقتى. الەمدە 4,5 ميلليوننان استام COVID-19 وقيعاسى تىركەلگەن. ءولىم جاعدايى - 300 مىڭ. تۇتاس وتباسىلار، قاۋىمداستىقتار، ۇلتتار زارداپ شەگىپ جاتىر. ارينە بۇل جەردە اۋرۋ تۋرالى عانا ەمەس، ءولىم تۋرالى، دەنساۋلىق ساقتاۋ جۇيەسىنىڭ كەمشىلىگى تۋرالى اڭگىمە ايتىلىپ وتىر»، - دەدى د د ۇ باس ديرەكتورى تەدروس ادانوم گەبرەيەسۋس 73-سەسسيانىڭ اشىلۋىندا سويلەگەن سوزىندە.
ونىڭ ايتۋىنشا، كوروناۆيرۋس پاندەمياسى ادام ويلاماعان وزگەرىستەرگە الىپ كەلدى.
«نەبارى 6 اي بۇرىن عانا شۋلى ءارى ومىرگە تولى قالالار بوس قالاتىنىن، مەيرامحانالار جابىلىپ، عالامدىق ساياحات توقتايتىنىن ەشكىم ويلاماعان دا ەدى. قازىر قاراپايىم قول بەرىپ امانداسۋدىڭ ءوزى - ءسىزدىڭ ءومىرىڭىز ءۇشىن قاۋىپتى»، - دەپ ەسكەرتتى د د ۇ باسشىسى.
تەدروس ادانوم گەبرەيەسۋستىڭ سوزىنشە، كوروناۆيرۋس اسىرەسە كەدەي ەلدەرگە قاتتى اسەر ەتۋدە. بۇل - داعدارىس اياسىنداعى ماڭىزدى پروبلەمالاردىڭ ءبىرى.
«التى ايدان از ۋاقىت ىشىندە پاندەميا بۇكىل الەمدى ءدۇر سىلكىندىردى. بارلىق ەلدەردىڭ الدىندا ۇلكەن قيىندىق تۇر. ءىرى جانە كىشى، باي جانە كەدەي، دامۋشى ەلدەر، قاقتىعىس ايماعىنداعى ەلدەر، ەڭ كوپ زارداپ شەككەن ەلدەر - ءبارى دە قازىر ۆيرۋس قۇرساۋىندا. ەلدى مەكەندەردە ءومىر سۇرگەن كەزدە الەۋمەتتىك قاشىقتىقتى قالاي ساقتايسىز، قولىڭىز گيگيەناسىن قالاي ساقتايسىز، تازا سۋ جەتكىلىكتى مە؟ كەيبىر مەملەكەتتەر ەلەۋلى شەكتەۋلەر مەن كارانتين ءتارتىبىن ەنگىزدى. كەيبىر ەلدەر قيىن جاعدايعا ەندى دايىندالىپ جاتىر. كەيبىر ەلدەر ءالى دە شەكتەۋلەردى قالاي الىپ تاستاۋ كەرەكتىگىن ساراپتاۋدا. د د ۇ ەلدەردىڭ اياققا تۇرىپ، قالىپتى ومىرگە ورالۋىن، جۇمىس ىستەۋگە دەگەن ۇمتىلىسىن تولىعىمەن قولدايدى ءارى تۇسىنەدى. ءبىز ءبارىمىز جاھاننىڭ تەزىرەك قالپىنا كەلۋىن قالايمىز. ەلدەردى ساقتىقپەن ارەكەت ەتۋگە شاقىرامىز. دەنساۋلىق ساقتاۋ ارحيتەكتۋراسىن ەسكەرۋسىز جىلدام جۇرگىزەتىن ەلدەر ۇلكەن قاۋىپ-قاتەرگە ۇشىراۋى مۇمكىن»، - دەپ ەسكەرتتى ۇيىمنىڭ باس ديرەكتورى.
